Татлилик бишерибиз

«Медовик» деген тортну «эринчек» деп айтылагъан енгил къайдасын биширеген кюйню таклиф этебиз. Шону этмек учун 15–20 минут гете. Тез этилсе де, ону гелген къонакъланы алдына салмагъа да «айып» тюгюл, агьлюде ашамагъа да бек арив болур.

Тизими. Хамур учун: 2 йымырткъа, 3 уллу къашыкъ шекер, 3 уллу къашыкъ синген бал, 1 гиччи къашыкъ сода, 2 стакан ун. Крем учун: 25 % къалынлыгъы булангъы 600 грам къаймакъ, ярты стакан шекер пудра.

Гьазирлев. Хамур учун йымырткъаланы, шекерни, балны бир къалипге гелгенче яхшы кюйде булгъай. Эленген унгъа сода къошула. Шоланы барысын да бирбирине къошуп булгъай. Шолайлыкъда гьазирленген хамурну, тюбюне кагъыз (пергамент) яйылгъан ялгъавгъа тёге ва 180 градусгъа ерли исси болгъан печни ичине (духовка) 15–20 минутгъа бишмеге сала. «Медовик» бишгенче крем гьазирлейбиз: къаймакъгъа шекер пудраны къошуп, булгъап, яхшы кюйде аталайбыз.

Печден чыкъгъан коржну бираз сувумагъа къоябыз ва уьч гесекге гесебиз. Кремни коржлагъа ва тортну ягъаларына сюртебиз. Сонг уьстюне уватылгъан гесеклени себип, 2–3 сагьатгъа кремни сингмеге къоябыз.