Янгы школа
Марьям янгы школагъа чыкъды ва биринчи гюн огъар бек къыйын тийди. Ол партаны артында яп-янгыз олтура, айлана якъда буса – танымайгъан белгисиз яшлар. Класдагъылар янгы охувчугъа къарай, тек таныш болмагъа бирев де янына гелмей. Ол бу мюгьлетде алдагъы къурдашларын эсге алып, бираз пашман бола.
Дарслардан сонг Марьям школаны абзарына чыгъа. Бираз ариде ону класындагъы бир-нече къыз топ ойнап гёрюне. Ол булар топ атагъангъа къарай, тек оюнгъа къошулма тартына. Амма топ ойнайгъан бир къыз муну гёрюп, иржайып:
– Бизге къошулма сюемисен? – деп сорай.
Марьям орам этип, ойнайгъанлагъа ювукъ геле. Бара-бара булар сёйлей, къатнама башлай, бир-бирине къужурлу хабарлар айта. Белгили болгъан кюйде, Марьям гелген клас спортну бек сюеген яшлар ва булар шагьар школаланы арасында оьтгерилеген ярышларда кёп ортакъчылыкъ эте. Марьям оьзю де алдан берли волейбол ойнай. Ол бу гьакъда билдиргенде бир класда охуйгъан яшлар бек сююне, неге десе ярышларда оьзлеге сынавлу оюнчу къошулду.
Янгы класдагъы къызлар илиякълы яшлар болуп чыкъды ва олар Марьямгъа оьзлени школасын танытды. Ювукъ арада школаны ичинде волейболдан ярышлар болажакъ ва класны командасы дарслардан сонг гьар гюн гьазирлик гёре.
Ярышланы гюню етишгенде булагъа къаршы ойнайгъан къызлар Марьямны гёрюп, кюлеме башлай ва:
– Бу янгы къыз булан сиз бизин утмажакъсыз! Алдагъы гезик де утмадыгъыз, гьали чи айрокъда артда къалажакъсыз, – деп билдире.
Команданы башчысы иржайып, Марьямгъа:
– Шолар айтагъангъа тынглама! Сен бек арив ойнайсан ва бирче биз олардан утарбыз, – дей.
Ярышлар бек оьчешивлю юрюле. Амма яшлар бир-бирин англап, кёмек этип ойнагъан ва бажарывлу оюн гёрсетген Марьямны къошуму булан булар утду ва ярышларда биринчи ерге чыкъды. Спортзалда буланы сююнюп къычырагъаны, харс урувлар уллу авазгъа айлана – яшлар бек шат. Ярышлардан сонг школаны директору къызланы макътап, булагъа гьюрметлев грамоталар тутдурду.
Инсан башында къоркъа ва оьзюн янгызлыкъда сезе буса да, бир-биревге табылыв къыйынлыкълардан баш гечирмеге кёмек эте.
