Сынав да болмай къалмас…
Бу дуньядагъы яшав сынав экенни билебиз. Мунда даим насипли болмакъ ёкъ, шо кюйде бир токътавсуз насипсиз де болмайбыз. Яратгъаныбыз сынай бизин ва къыйынлыкъланы енгиллик булан аралап йибере. Булайлыкъда яхшылыкъ бар экенге шеклик де ёкъ.
Гьар инсан оьз сынавларындан оьте. Шо сынавлар ол этген гюнагьлагъа яда Есибизни алдындагъы гьалына гёре бола. Амма Яратгъныбызны терен гьакъылына ва машгьюрлюгюне гёре, биз гёреген сынавлар гётерип болагъандан артыкъ берилмей. Биревге де чыдап боларындан уьстюн берилмей.
Инсан башдан гечиреген гьар авурлукъ, къыйынлыкъ ол чыдап болажагъындан артыкъ берилмей. Биревлеге къопгъан балагь яда къыйынлыкъ этген хаталарыны оьлчевюне гёре шолардан чайылыв бере, башгъаланы буса, сынавлардан оьтгени булан Аллагьны ﷻ алдындагъа даражасы арта. Нечик болса да, Аллагьу таала Оьз къулуна береген бир къыйынлыкъ да огъар зарал болсун деп берилмей. Неге десе Есибиз бизин бир инсан да сююп болмасдай бек сюе. Амма насипли болмакъ дегенни артдын чабагъанда биз бир-бирде шо ойну унутуп къоябыз. Къыйынлыкълагъа каршы болгъанда да оьзюбюзню оьтесиз насипсиз ва къыйыкъсытылгъан гёребиз.
Этилген гюнагьларыбыздан бу дюньяда чайылмагъа болагъаныбыз саялы биз Яратгъаныбызгъа шюкюрлюк этмейбиз. Ахыратдагъы жаза бирден-бир къоркъунчлу, къатты ва чыдамсыз экенни унутмайыкъ. Гьар тюрлю сынавлагъа бетге-бет турагъанда ким буса да шо гьакъда ойлашамы экен? Сынав узатылагъанда ким буса да, шо къыйынлыкъ даим болмасны гьакъында оюна гелтиреме?
Шолайлар аздыр деп эсиме геле…
Кёбюсю гезикде биз оьзюбюзню гьалыбызгъа рази тюгюлюбюз, шолайлыкъ булан Есибизни ачувун да чыгъартып. Яратгъаныбыз бергенни рази кюйде къабул этмек, Ону гьукмусуна таби болмакъ – ахыратда йимик бу дюньяда да насип гелтире. Оьзюне Еси булан берилген яхшылыкъны да, къыйынлыкъны да рази кюйде къабул этмеге болагъан адам оьзюн насипсиз гьис этмес. Аллагьны ﷻ къадарына рази къалагъан гиши насипли болмай болмас.
Шолай гьислерден арек адам буса, насипсиз гёрер оьзюн. Яшавда чыдамагъа къыйын гьаллардан баш гечиреген гезиклер болагъанны бирев де инкар этмей. Шолай гезиклерде чыдамлыгъым етишмес деп ойлашсакъ да, гьал бир кююнде къалмайгъаны чы ачыкъдан-ачыкъ. Аллагьны ﷻ рагьмулугъуну дазусу ёкъ ва Яратгъаныбыз къулу гётерип болмасны бермей. Шо саялы бирт де умутугъузну уьзмегиз. Чыдамлыкъ битген деген гьалгъа етишгенде буса, Юсуп пайхаммарны u ва Аюб пайхаммарны u, олай да фиръавунну къатыны Асиятны эсге алыгъыз. Олар оьтген къыйынлыкъланы гёз алдыгъызгъа гелтиригиз, неге десе олар гёргенни къырыйын сама да гьис этегенибизге тамаша бар. Олар барысы да гьар гёрген гьалында Есибизге рази къалагъанын унутмагъыз. Шолайлыкъны эсге гелтиригиз ва умут уьзмегиз.
Есибиз Аллагь ﷻ Ер юзюнде даим насипли яшажакъбыз деп айтмагъан, тек Яратагъаныбыз багъыйлы яшавдан оьтсек ахыратда насип боларны гьакъында сёз бере. Олай болгъан сонг насипни артыдан чапмагъа тарыкъ тюгюл, Есибизни разилигин излемеге ва шол учун къаст къылма тарыкъбыз. Шолай этмеге болсакъ сав оьмюр боюбузда насипликни сезербиз. Мен буса сизге эки де дюньяда яхшылыкъ ва насип ёрайман! Къыйынлыкъларыгъызны орнунда енгилликлер гелсин.
РАЯ АКАВОВА
