Уллу Уьстюнлюкню Гюню булан!
ДР-ны алимлерини Советини председатели, муфти шайых Агьмат-афанди уьлкебизни ватандашларын Уллу Уьстюнлюкню Гюню булан къутлай
«Ассаламу алейкум ва рагьматуллагьи ва баракатугьу! Уллу Ватан давну абурлу ветеранлары ва тылны загьматчылары! Гьакъ юрекден Уллу Уьстюнлюкню Гюню булан къутлайман сизин! Уьлкебизни гьар ватандашы учун, гертиден де, бу бек аявлу ва бютюн халкъ учун ортакъ байрам. Бу агьвалат гьар ожакъгъа ва гьар адамгъа тие. Уьстюнлюк учун халкъыбыз гёрсетген зор уллу игитликни ва тёлеген гьагъын биз бек абурлайбыз ва бир заманда да унутмасбыз.
Есибизни пурманы булан сиз ватаныбызны сакълагъандан къайры, ону янгыдан аякъгъа тургъуздугъуз ва бизге парахат яшавлукъ бердигиз. Айрыча баракалла – тылны загьматчыларына, фронтдагъы къатынгишилеге, давну заманында уллулагъа къошулгъан оьрюм яшлагъа тийишли. Шо йылларда халкъыбыз миллет ва дин айырмай азатлыгъыбызны сакъламагъа болду. Нечакъы сюймесек де, ветеранланы санаву йыл сайын аз бола. Къоччакъ ата-бабаларыбыз учун оьктем болув ва оланы абурлав – биз олагъа этмеге болагъанны лап азы. Есибиз Аллагь ﷻ гьарибизге уллуланы сююв ва оланы абурлав салгъан. Тирмизи сакълагъан гьадисде Пайхаммарны ﷺ булай сёзлери бар: «Гиччилеге языкъсынмайгъан ва уллуланы (чагъына ва билимине гёре) абурлап болмайгъанлар бизден тюгюл».
Аявлу ветеранлар, оьр къылыкъларыгъыз ва яхшы ишлеригиз, адиллик ва ватанны сюювюгюз парахат яшавгъа ва загьмат тёгювге бугюнлерде бизин де ругьландыра. Рагьмулу Аллагьдан ﷻ сизге савлукъ ва узакъ оьмюр берсин деп тилеймен, яшагъан гьар гюнюгюз ювукъ адамларыгъызны гьай этивю ва агьамият беривю булан толсун».
