Насипли болма къасткъылыгъыз

Агьлю яшавгъа янгы къурулгъан ожакъ гьазирленме болагъан ёллар

(Давамы. Башы алдагъы номерде)

Эр-къатын татывлу нечик яшамагъа бола деген мекенли къайдада язылгъан «инструкция» тапма къыйын буса да, яшавда тарыкълы ва къыйышма болагъан ёравлар ёкъ тюгюл. Жагьиллеге кёмек этмеге болагъан бир-бир ёравланы эсгерейик бугюн.

Ругь булан байлавлулары

Бирче яшама яшав ёлдаш табылгъан сонг, жагьиллени гьариси оьз уьстюнде ишлеме, къылыкъларын яхшылашдырма герекдир.

Шолай этмек гележек яшавугъуз, олжагъыз ва туважакъ яшларыгъыз учун да тарыкъ, оьзюгюзге де агьамиятлы. Ожакъдагъы гьар ким гележек яшаву учун гьазирленмеге, ону яхшы этмек учун къасткъылмагъа тарыкъ. Агьлю яшав тюзевлю болгъанны сюегенлер гьаракат этмесе бажарылмайгъанны англай.

– Инг башлап ругь ва къылыкъ гьазирлик башланма герек. Лап биринчилей этилмеге тарыкълы зат – агьлю къуруп, ожакъны гележеги учун къасткъылмагъа, деп къатты ва гьакъ юрекли негет болмагъа тарыкъ. Инамлы олжа боларгъа къатты кюйде токъташмагъа, хыянатлыкъ этмесге, агьлюге къаршы чыкъмасгъа мекенли тюшюнмеге тарыкъ.

– Оьтген яшавгъа гёз къаратмагъа, йиберилген хаталагъа, осал ишлеге ва гюнагьлагъа багьа бермеге ва шолар саялы Есибизден гечмекни тилемеге, товба этмеге тарыкъ. Шолар дагъы болмасгъа, гюнагьдан сакъланаргъа юрекде негет болмагъа тийишли.

– Бары да зараллы мердешлени къоймагъа тарыкъ. Сигарет тартывну, ички ичивню, наркотик къоллавну, азарт оюнлар ойнамакъны ва шо кюйдеги оьзге яман ишлени бютюнлей ташлама тарыкъ.

– Гьали болгъанча гелешмиш гьисапда къаралагъан бары да танышлардан арчылмагъа тарыкъ. Олар булангъы байлавлукъланы, къатнавну да уьзмеге герек. Ушатагъан, юрек авма болагъан гьар ким булан да, олар дагъы эсге гелмейген кюйде, тюбюкъарадан айрылмаса ярамай.

Эргиши-тиштайпа аралыкълар булангъы алдагъы ювукъ къурдашларыгъыздан айрылгъандан къайры, шо гьакъда соцсетлерден таба билдирмеге де яхшы болур. Энниден сонг агьлю къурулгъан ва алдагъы къатнавгъа ер ёкъ.

– Яшайгъан еригизде айтылгъан, абурлу ругьани къуллукъчу, динагьлю адам булан ёлугъуп, болажакъ агьлю къошулувну ва бирче яшавну гьакъында ёравлар алса яхшы болур. Шолай ёравлар бирче яшавну дурус къуруп бажармагъа, ругь якъдан чыныкъмагъа кёмек этер.

Къаркъара булан байлавлу

Докторланы янына барап, къаркъараны гьалын ахтармагъа, тергетип къарамагъа яхшы болур. Ким биле гьали болгъанча билинмей тургъан аврувлар табылмакъ бар, Аллагь ﷻ гёрсетмесин яман аврувлар чыгъып къалмасын. Балики, аврувлар оьрчюкгенче заманында билингенде, олардан къутулма да тынч болур. Эгер де о-бу аврув ачыкъ болса, шоссагьат шолардан сав болмакъны гьайын этмеге тарыкъ. Гьар ким учун савлукъ лап уллу байлыкъ ва агьлю яшавгъа да ону тувра таъсири бар.

Булай алгъанда, савлукъну гьайын даим этмеге тарыкъбыз ва аврумайлы узакъ яшама сюе бусакъ, докторлар айтагъанны этмеге тарыкъбыз.

Кемчиликлерден къутулув

Лап ювукъ ва инамлы адамларыгъыз, инг башлап ата-анагъыз булан сёйлеп къарагъыз ва оьзюгюзню гьакъында: «Не кемчиликлерим бар? Шоланы алышдырмагъа боламанмы? Мен этеген ишлени эрши гёрюнегенлери бармы?» – деп сорав берип, билмеге къаст этигиз.

Эгер шолай соравлар бермеге къоркъа бусагъыз, шо яхшыдыр. Берилежек жаваплардан къоркъмакъ бар, тек шоланы бермей къоймакъ дурус болмас.

Агьлю яшав тюзелмек ва къылыкълар яхшы болмакъ учун, шолай соравлагъа жавап алмакъ бек агьамиятлы.

Бу меселдеги сорав-алыв бизин нукъсанлыкъларыбызны аян эте. Инсан оьзюню кемчиликлерин гёрмей, билмей къалмакъ бар, огъар ягъадан айтмай туруп. Ювукъ адамыгъызны осал ерлерин ачыкъ этип, оланы тюзлемекни гьайын этигиз, эр-къатын бир-бирине шолай кёмек этмесе ярамай.

Акъчагъызны дурус харжлама уьйренигиз

Уьйленмекни гьакъында ойлашма заман гелгенде акъча булангъы ишни ёрукълу этмесе болмай. Харжны гьакъыллы кюйде юрютмек – агьлюню, яшланы гьайын этип болмакъ демек. Маяланы гьакъында ойлашмай, олагъа къол силлеп къойса, бара-бара шо уллу масъалагъа айланма бола. Шо саялы акъча нечик харжаланажагъын алданокъ ойлашыгъыз. Агьлюню тарыкъ-герек булан болдурмакъ – эргишини борчу.

Агьлю къурулгъан сонг, бойдакъ яшавда йимик болмай ва хыйлы затны гьайын этмеге тарыкъ бола.

Янгы яшав къурулгъанда къызгъанчлыкъдан эркин болма тарыкъ, олай да артыкъ чомартлыкъ да яхшы тюгюл. Агьлюню акъча булан таъмин этмеге борчлу эргиши ожагъына тарыкълы бары да затны алмагъа, къазанып болмагъа тарыкълы.

Асил къылыкъ

Асил къылыкъ – янгыз агьлюде болмагъа тийишли хасият тюгюл, шо дюр бу ва герти дюньяда талайлыкъны эшигин ачагъан ачгъыч. Насипли болмакъ учун, инсан таза юрекли, арив хасиятлы, оьр къылыкълы, айлана якъдагъылагъа гьюрметли янашагъанлардан болмагъа тарыкъ.

Аслусу – насипликге талпынмакъ

Агьлю яшавгъа толу кюйде гьазирленмеге бажарылмайгъанны англама тарыкъ. Бары да зат нечик болажагъын алданокъ билмеге болмай. Адамлар бир-бирине ошамайгъанда йимик, гьар агьлю де башгъа-башгъа. Биз нечакъы гьаракат этсек де, нечакъы къасткъылсакъ да, агьлю яшавгъа гьазир болдум деген даражагъа етмеге болмасбыз. Тетиксиз агьлю къуруп боларман деп ойлашагъанлар узакъ къарар. Той болагъан гюн бир жагьил адам да агьлю яшавгъа бютюнлей гьазир болдум деп ойлашмай. Шолай болма да бажарылмай. Бир гьазирлик де, бир гьаракат да сав оьмюрге чакъы узатылажакъ бирчеги агьлю яшавгъа онгармагъа болмас. Бугъар яшав барышында кюйленмеге тарыкъ, шо бир зор загьматдыр.

Эр-къатынны аралыгъы оьмюр бою гьар тюрлю ишлерден толажакъ ва насипли агьлю къурма сюегенлер яшавда ёлугъагъан масъалаланы чечип бажармагъа тарыкъ. Лап яхшы агьлю – бир-бирине ёл къойма гьазир, бир-бирин англап яшайгъанлардан къурулгъан ожакъ.