Къолкъотур булангъы нохут каш
Охувчуларыбыз ушатагъан енгил ва учуз этилеген ашланы гьакъында язып узатабыз. Бугюн къолкъотур булан нохут каш этилеген кюйню аян этебиз.
Ашамлыкъ якъдан нохут гьайван этден артда къалмай. Нохутну да, къолкъотурну да тиштайпаны савлугъу учун пайдалы фолиевый кислотасы бар: шо къартлыкъны токътата, яш табыв системаны аяп сакълай. Ондан къайры, нохутдагъы нуклеиновый кислота гён учун да пайдалы. Уллу чагъындагъы къатынгишилер учун нохутну пайдасы атеросклерозгъа къаршы турувда ва давлениени басылтагъанда да бар. Нохут юрек ишлевге ва иммунитет системагъа пайдалы санала. Къолкъотур буса, В витаминден къайры, цинк, калий, магний, йод, D витаминли затлар булан «бай». Уллу чагъындагъы адамлар учун къолкъотур сюек беклешдиривю булан пайдалы. Олай да, къолкъотур къаркъарадагъы холестеринни аз эте, юрекни ва къан тамурланы беклешдире.
Тарыкълары (орта гьисапда, 4 адам тояр чакъы): нохут – тёбеси булан толгъан 1 стакан, къолкъотур – 5-7 уллусу, согъан – 2, туз, самурсакъ, яшылча ва специялар гьар ким ушатагъан кюйде, урлукъ май – 3 уллу къашыкъ, аш сода – гиччи къашыкъны учунда.
Бир-бир къатынгишилер нохутну сувгъа салып гечеге къоя, тек шолай этмесе де ярай. Эгер нохутну сувгъа салып гечеге къойгъан буса, артындагъы гюн отну уьстюне биширме салгъанча, шо сувну ташлап, янгысын тёге (1 стакан нохутгъа, 3 стакан сув). Сув къайнамагъа башлагъанда сода къошула. Гёбюкню тайдыра турмагъа тарыкъ болажакъ. Бираз туз къошуп, отну аста этип биширебиз, заманда бир къазанны къапгъачын ачып булгъайбыз. Ярым сагьатдан нохут бише, къалын бола, бокъурлама башлай. 40 минутдан каш гьазир деп айтма ярай.
Нохут бишегенде къолкъотурну гьайын этебиз. Шону учун къайсы да ярай, тек биз шампиньон журасын алабыз. Къызгъылт-сари болгъанча бир башлап ялгъавда тувралгъан согъан къызартабыз. Къолкъотурланы жувабыз, орта кюйде гесип, ялгъавгъа къошуп, согъан булан аста отда къызартабыз. Гьазир болмагъа 5 минут къалгъанда туз, специялар, уватылгъан самурсакъ къошабыз. Ялгъавдагъы бары да затны гьазир нохут кашгъа къошуп булгъайбыз. Къапгъачын ябып, отдан тайдырып, уьстюн чюй явлукъ (полотенце) булан чырмап, 20 минутгъа къоябыз. Сонг къолкъотур булангъы кашны дёгерек оччам (петрушка), оччам (укроп) ва оьзге янгы яшылчалар булан безендиребиз. Аш гьазир!
