Кишмиш ва какао булангъы пирог
Чай ичмеге арив тиер, татли ва учуз олтурагъан пирогну таклиф этебиз.
Тарыкълылары: кефир – 2 стакан, ун – 1 стакан да, уллу эки къашыкъ да, манка – 1 стакан, какао – 2 уллу къашыкъ, кишмиш – ярты стакан, шекер – 1 стакан, урлукъ май – ярты стакан, сода – ярты гиччи къашыкъ яда хамур учун 1 гиччи къашыкъ разрыхлитель.
Манка стаканны (орта гьисапда 250 грам) къазангъа тёгюп, шекер къошабыз ва булгъайбыз. Манканы сонг къоллайгъанда о тююрлерсиз болмагъа тарыкъ. Сонг йылы кефир къошабыз ва янгыдан булгъайбыз. Шо кюйде гьазирленген затны шишмек учун ярым сагьатгъа къоябыз. Сонг урлукъ май, ун ва разрыхритель къошуп булгъайбыз. Гьазир болгъан хамурну экиге бёлебиз: бир яртысын башгъа къазангъа чыгъартабыз. Хамурну бир яртысына эки къашыкъ ун ва кишмиш къошабыз, башгъасына – какао. Ялгъавну тюбюне ва ягъаларына ябушмас учун урлукъ май сюртебиз. Ялгъавну ортасына астаракъ булан ачыкъ тюсдеги кишмиши булангъы хамурну эки-уьч къашыгъын салабыз. Уьстюне шончакъыны шоколад хамурну да салабыз (тюпдеги къат айланып-айланып ягъаларына яйыла). Сонг янгыдан ачыкъ тюсдеги хамур, къара тюсдеги булан гезик булан битгенче чыгъартыла. Булар бир-бири булан булгъанып ва яйылып арив гёрюнюшлю бола. Пирогну печге йибергенче, бирдин-бир гёзел этмек учун, ону уьстюнде спичка таякъ яда шолай оьзге зат булан гьызлар тартып, накъышлар этип безендирмеге ярай. Бу татлиликни 40 минутгъа ювукъ бишире.
Ашыгъыз берекетли болсун!
