«Бурма» шорпа
«Бурма» шорпа
Бу шорпа ССССР-ни заманындан белгили. Енгил ва тойдурагъан бу шорпа тавукъ этден этиле, шо саялы авруйгъанлагъа да арив къыйыша. Яшлагъа бермеге де яхшы санала. «Бурма» деп огъар аталангъан йымырткъалар саялы айтыла.
Тарыкълылары: тавукъ эт, чита (морковь) – бир, согъан – бир, картоп – уьч, йымырткъа – эки, вермишель – 50 грам, сув – эки литр, урлукъ май – эки уллу къашыкъ, туз – гьар ким сюйген кюйде къоша, лавр япыракъ – бир, къара бурчну бюртюклери – уьч.
Оьлчевюне гёре къыйышагъан къазан алып, ичине сув тёгебиз, бурчакъ, лавр япыракъ, бурчну бюртюклерин къошабыз ва тавукъ эт булан къайнама салабыз. Шорпасы къалын болсун учун, тавукъ этни сюеклери булангъы ери яхшы болур. Этни аста отгъа салып, 40 минут биширебиз. Сонг, эт бишгенде, къазандан чыгъартып, сувутуп ва гесек-гесек этип туврайбыз.
Тавукъ эт сувуйгъан заманда, заманны тас этмей, читаны ва согъанны туврап урлукъ майда къызартабыз.
Картопну гиччи гесеклеге туврап, аста отдагъы шорпагъа къошабыз ва 15 минутдан гьазирленген ва къызартылгъан читаны да, согъанны да къошабыз. Бирдагъы етти минут токътагъан сонг, шорпагъа вермишель къошабыз. Эки йымырткъаны аталап, астаракъ шорпагъа агъыздырып тёгебиз. Бирдагъы эки минут биширген сонг, шорпа гьазир. Бошгъаплагъа чыгъаргъан сонг ичине тавукъ этден де къошабыз.
Ашыгъыз татли болсун!
