Уьюбюзню къолларыбыз булан безендиребиз
Уьйню безендирмек учун кёп харж чыгъарта турмакъ борч тюгюл. Ожакъны ичин къол тюпдеги, простой материаллар булан исбайы гёрюнюшлю, багъыйлы ва къужурлу алай да арив этмеге бола.
- Кагъыздан ва картондан этилгенлери. Тамаша гёрюнсе де, ренкли кагъыздан ва картондан уьйню ичин безендиреген хыйлы зат этмеге бола. Масала, кагъыз «гюллер» яда «жан-жанывар» этмеге бажарыла. Сонг да, бу ишлер учун эсги журналланы, газетлени ва тарыкъ тюгюл кагъыз гесеклени къоллама бола.
- Согъулуп этилгенлери. Согъув булан долана бусагъыз, арив юкъкъа ювургъанлар, тастумаллар яда бойлукълар этмеге боласыз. Къол булан этилген бу затлар уьйню безендирежек ва онгайлыкълар яратажакъ. Согъагъанда ярыкъ ренклер, къужурлу накъышлы суратлар этмеге къарагъыз, дагъыдан бек арив болар.
- Гиччи бойлукълар. Ачыкъ тюслю ва арив гёрюнюшлю бойлукълар – кёп харж чыгъартмайлы уьйню ичин янгыртмагъа кёмек эте. Шоланы эсги къумачлардан яда тюкенден учузларын алып, алай арив этмеге бола.
- Къуругъан чечеклер ва бутакълар. Сурайылны (ваза) ичине къуругъан чечеклер ва бутакълар салма боласыз. Шолай этсегиз, уьйню ичине табиат гёзеллик къошулар. Къуругъан чечеклени ва бутакъланы тапмагъа къыйын болмас, ювукъ арадагъы паркда яда агъачлыкъда шолар нечакъы да бар.
- Къумач чечеклер ва безенчиклер. Къумачдан чечеклер ва бир-бир безенчиклер этмеге бола. Олар уьйню ичин янгыртар. Мунда уста дерзи (портниха) болмаса да ярай, къолу булан болагъан кюйде тикмек таманлыкъ эте.
- Табии материаллардан этилген безенчиклер. Орамда, къырда аякъ тюпде арив гёрюнюшлю ташлар бола, шоланы жыйып исбайы гёрюнюшлю декор этмеге ярай. Ташлардан чечеклени тюбюн безендирме яда бир ерге айрыча яймагъа бола.
Оьз къолу булан уьйню ичин безендирмек – яратывчулукъгъа къошулма тамаша арив кюй. Дагъы биревде де ёкъ, оьзюнг этген безенчиклер яшайгъан ерингни бирден-бир арив эте. Шону учун оьзюгюз ушатагъан не затны да къоллама боласыз.
