Къайгъы басгъан гьалдан нечик къутулма бола?
Къайгъы басгъан гьалдан нечик къутулма бола?
Бир-бирде къайгъы басгъанлыкъны арыгъанлыкъгъа санайбыз. Шо гьалда нечесе гюн турагъаныбызны да гьис этебиз. Амма не саялы къайгъыгъа тарыгъаныбызны ва яшавну леззетин алмакъ учун не этме тарыкъны билмейбиз.
Къатынгишини яшавунда гьислер уллу роль ойнайгъан саялы (эргишилер олай тюгюл), гьалыбызны бу яны бек агьамиятлы. Гьатта янгыз бизин учун тюгюл, айлана якъдагъылагъа да тиштайпаны гьалы бек таъсир эте.
Гёнгюлсюз не себеплерден болагъаныбызны ва шогъар къаршы не этме тарыкъны ахтарабыз.
1. Бар-барлыгъыбызны къыйматлайыкъ
Къолубуздагъы яхшылыкъны къыйматлап болмакъ – пайдалы гьюнер, шогъар етишип болма да тарыкъ. Шолайлыкъгъа шу гюн булан яшамакъ дей. Алышдырып болмайгъан гетген ишлени гьакъында ойлаша турма тарыкъ тюгюл. Сонг да, гёнгюбюз бузулмас учун, гележекге артыкъ умут этмесе яхшыдыр.
2. Башгъалар макътагъангъа къарайбыз
Оьз-оьзюбюзге шонча да инанмайбыз, гьатта башгъа адамлар не айтаргъа къарайбыз, макътаргъа умут этебиз. Оьз къыйматлыгъыбызны англама ва оьзюбюзню сюймеге яхшы болур. Бизин гьакъыбызды башгъалар не ойлашагъангъа къулакъасмай къойсакъ яхшыдыр.
3. Заманыбызны тюз къурма болмайбыз
Биревлер гюнню ичинде хыйлы иш этмеге бажара, башгъаланы къолундан иш чыкъмай ва сонг гёнгю бузулуп олтура. Заманны тюз къуруп болмакъ бек агьамиятлы ва агьлюге, уьйню тарыкъ-герегине, оьзюнге (савлугъунга, билим артдырывунга, ял алывунга, къатнавунга), ишинге шо етишмеге тарыкъ. Шону учун агьамиятлы ишлер дурус белгиленмеге тийишли.
4. Уллудан умут этме тарыкъ
Бир-бирде умутларыбыз шонча да къуршай бизин, гьатта болуп турагъан яшавну эс этмей къалабыз. Умут этмек яхшыдыр, тек шону булан бирче мекенли ишлер гёз алгъа тутулуп, оьзюнгню гючюнг чатагъанны биле бусанг.
5. Оьзюбюзню башгъалар булан тенглешдирип къарайбыз
Тыш гёрюнюш, гьакъыл, уьстюнлюк, байлыкъ, жамият яда агьлю гьал – бир-биревлеге оьзюн башгъалар булан, аслу гьалда белгили адамлар булан тенглешдирмеге хыйлы ёл ачылгъан. Бу тенглешдиривлер яхшылыкъ гелтирмей, неге десе юрекде гюнчюлюк тува, разисизлик оьсе, гёнгю бузула. Тенглешдиривлер этмесе яхшы, неге тюгюл гьар кимни оьзтёрече пагьмусу бола ва сизде бар яхшылыкъ тенглешген адамда болмай къалмакъ бар. Ондан къайры, уьстюнлюкге етмек учун ол адам не къыйын тёкгенин билмейбиз. Жаныбыз рагьат болгъанны сюе бусакъ, тенглешдиривлени къоюп, муратларыбызгъа оьз гючюбюзге таянып етмеге тарыкъбыз.
6. Зараллы затланы къойма тарыкъ
Зараллы затланы къоюп, пайдалыларын сайламакъ – жанны гьалына тувра таъсир этегени белгили. Къачан ва нечакъы ашайбыз, не ашайбыз, ари-бери юрюш бармы-ёкъму – булар барысы да насип сезмек булан тувра байлавлу. Сав яшавгъа багъып абат этмеге къарайыкъ, шо ёл булан юрюме башласакъ, жаныбыз рагьат боларгъа умут этме ярай.
