Къолкъотур, овощлар ва бишлакъ булангъы тавукъ
Тарыкълылары: тавукъ эт – 180 грам, картоп – 1 бола, къолкъотур (шампиньоны) – 160–170 грам, помидор (орта оьлчевдеги) – 2 бола, согъан (орта оьлчевдеги) – 1 баш, йымырткъа – 1 таман, бишлакъ – 80 грам, къаймакъ – 80 миллилитр, май – 20 миллилитр, яшылча (зелень) – бир гиччи къысым, туз – гьар ким татывуна гёре, къара бурч (оьзге специялар да къыйыша).
Тавукъну жувуп, гиччи гесеклеге гесебиз. Картопну тазалап, ону да юкъкъа этип гесебиз. Согъан тазалап, ону да дёгерек этип гесебиз. Жувулгъан помидорну сыйпап къурутуп, назик этип гесебиз. Бишлакъны къыравучдан (тёрка) чыгъартабыз. Сонг отдан къоркъмайгъан савутну тюбюне тавукъ эт яйып, уьстюне туз, бурч, оьзге специялар себебиз. Сонг этни уьстюне картоп яйыла ва специялар къошула. Жувулгъан, къурутулгъан къолкъотурланы (грибы) туврап, 10 минут къызгъан майда къызартып битип, картопну уьстюне къошабыз. Арты булан согъан ва помидор салына. Сонг савутгъа заливка къошула. Ону булай эте: кёп къалын тюгюл къаймакъны терен бошгъапгъа тёгюп, йымырткъа, туз ва бурч (специялар) къошуп, яхшы кюйде аталайбыз. Сонг булар барысы да гьазир болгъанда, 45 минутгъа 190 градусгъа къызгъан печни ичине салабыз. Сонг печден чыгъартып ашыбызгъа къыравучдан чыкъгъан бишлакъны себип, янгыдан печге салабыз ва онда 10 минут къоябыз. Тувралгъан яшылчаланы (зелень) уьстюне сепгенде – аш гьазир.
Ашыгъыз берекетли болсун!
