Бурчакъдан этилген катлет
Учуз олтурагъан ва этмеге тынч ашланы гьакъында язагъаныкъны узатабыз. Бурчакъ бизин якъда генг яйылгъан, о бавур ва оьт къапчыкъ (жёлчный пузырь) учун пайдалы деп санала. Бу гезик бурчакъдан катлет этилеген кюйню язып, шону сизге таклиф этебиз.
Тарыкълыгъы: бурчакъ – 500 грам, морковь – 1, согъан – 1, туз – гьар ким сюйген кюйде къоша, къара бурч ва оьзге специялар – гьар ким ушатагъан кюйде къоша, ун – 2 уллу къашыкъ, урлукъ май – 1 уллу къашыкъ (орта гьисапда).
Катлет учун бурчакъны консерва къутукъдагъысы да, бишгени де къыйыша. Бурчакъ биширгенче, ону жувгъан сонг, шишмек учун сувукъ сувда ярым сагьатдан бир нече сагьат болгъанча къоябыз (гечеге къойма да ярай). Сонг янгыдан таза сувда жувуп, бишмеге отгъа салабыз. Сув къайнамагъа башлагъанда отун аста этип биширебиз. Туз къошабыз. Бишген сонг, сувун тайдырып, бурчакъны сувумагъа къоябыз.
Морковну тазалап, къыравучдан (тёрка) чыгъартабыз. Согъанны къабугъундан тазалап, увакъ этип гесебиз. Он минутгъа ювукъ урлукъ майда морковну да, согъанны да биширебиз. Яшылчаны (овош) орнунда, масала, къолкъкотур (грибы), яшылчалар (зелень), самурсакъ, гьатта къоз къызартып онгармагъа да ярай. Бишген бурчакъны ва къызартылгъанны блендер яда эт тюеген машинден чыгъартып, пюре йимик уватабыз. Туз, бурч, специялар къошабыз. Булгъайбыз. Катлет даражагъа гелтиребиз. Гьар катлетни эки де янындан унгъа бёлейбиз.
Ялгъавдагъы къызгъан майгъа катлетлер салып, эки янындан, орта гьисапда, дёрт минут къызартабыз.
Катлетни къувурма, къаймакъ яда кетчуп булан ашама, олай да, этге, тавукъгъа яда чабакъгъа къошуп бермеге де ярай.
