Учуз олтурагъан тазалыкъ алатлар
Уьюбюзде ону-муну тазалайгъан хыйлы алатлар баргъа уьйренип къалгъанбыз. Печни, раковинаны, гюзгюню, савут-сабаны, къазанны, жабарны – гьарисин тазалайгъан хас алат бар. Амма гьали-гьалилерден, 20–30 йыллар алъякъда бизин аналарыбыз ва улланаларыбыз тазалыкъ учун мунчакъы кёп алат къолламай эди. Шогъар да къарамайлы, уьйлер тап-таза сакълана болгъан. Олар лимон, сода, сирке ханц (уксус), сапун булан айлана якъны батмагъа къоймай, алай арив юрюте эди.
1. Май тайдырагъан кюй
Бу бек къыйын насны горчичный порошок булан алай арив ёкъ этмеге бола экен. Улланаларыбыз шону къоллайгъан кюй эсигиздеми? Химия сурсат булан иш гёрмеге ярамаймы деп, биз о заман тамаша бола эдик. Гьакъыкъатда буса, бир литр сув ва гиччи къашыкъ горчица булан ялгъавну, печни уьстюн, шолай оьзгени йыртыллатмагъа бола экен! Холодильникге сув тиймейген ва дым болмайгъан кюйде горчица салса, шону ичинде бирт де яман ийис болмас.
2. Лап яхшы акъ этив
О заманларда нени буса да акъ этмек учун марганцовка ва 72 процентлик ийис сапун къоллана болгъан. Шону кёмеги булан акъ этмекден къайры опуракъны дезинфекция да эте болгъан. Ийис сапунну 100 грамын увата ва исси сувну ичинде ирите. Шо исси болгъан аз сувну ичинде 5 грам марганцовканы тююрлери къалмайгъан кюйде яхшы кюйде булгъап ирите. Легенге сувукъ сув тёгюп, арты булан шо растворну къоша. Сонг шону ичинде бир-нече сагьатгъа опуракъны йибите. Сыгъып, яхшы кюйде чайгъан сонг, къурумагъа иле. Натижасын гёрсегиз гьайран болурсуз!
3. Не зат учун да къыйышагъан тазалавуч
Сирке ханц (уксус) тазалав ишлерде кёп къоллана ва шону 9 процентлигине, сув ва эфир май къошса, нени де тазалайгъан бек тизив къурал болур.
Сирке ханцны сув булан бир тенг этип къошгъан сонг, олагъа бир-нече тамчы эфир май къошабыз. Сонг шу смесни себелейген шишагъа тёгюп, шкафланы, кафельни ва шолай оьзгени тазаламакъда къоллайбыз.
4. Мебельни йыртыллатмакъ учун
Гьар кимни уьюнде мебель бар ва шону аяп сакълайбыз, гёрюнюшю арив болсун учун буса, глицерин ва сув тарыкъ болажакъ. Гьалиги алатларда да глицерин генг кюйде къоллана. Шону яхшылыгъы булан мебель чангдан хыйлы замангъа аман сакълана. Глицерин спиртни гиччи къашыкъны яртысын таза чюпюрекге тёгюп, ачыкъ ерлеге сыйпай. Къолламагъа булай енгил кюй мебелигизни бир-нече жумагъа чангдан сакълар. Шо меселде жабарны жувмагъа да ярай. Шону учун 5 литр сувгъа уьч уллу къашыкъ глицерин къошмагъа тарыкъ болур.
5. Аш сода – яшавда ажайып кюйде къолланмагъа бола
Кёплер эшитгендир, аш соданы пайдасыны гьакъында. Ону кёмеги булан савут-сабаны, печни тазаламагъа бола, гьатта халчаны да янгыртмагъа ярай. Хали яда халча арив гёрюнсюн учун, уьстюне сода себелеп, ярым сагьатгъа къоймагъа тарыкъ. Шо заманны ичинде сода халини уьстюндеги насланы, ийислени оьзюне тартып ала. Сонг яхшы кюйде пылесос булан шону соруп тайдырмагъа тюше. Сувгъа къошулгъан сода раствор буса, холодильникде, шкафларда, чёп ташлайгъан челекде ийис тайдырар.
