О-бу затланы къоллавну янгы къайдалары
О-бу затланы къоллавну янгы къайдалары
• Печни ичиндеги челтирни тюрлю кюйде къолламагъа бола. Масала, экмек гесеклени къызартмагъа ярай. Олай да, тавукъ этни къызартмагъа да бола, шону учун къазанны къоллап турмакъ борч тюгюл. Печни челтирине салып, оланы биширмеге бола, майы агъыла буса, тюбюне ялгъав салма ярай.
- Шиша савут заман гетип тунукъ бола яда саргъая, даим жувула буса да. Шону алдагъы кююн къайтармакъ учун, химия алатланы къолламакъ борч тюгюл. Халкъ къоллап гелген бырын къайдадан пайдаланма бола. Терен савутгъа бир литрден кем йылы сув тёгебиз, уьч уллу къашыкъ горчица порошок ва эки къашыкъ сирке ханц (уксус) къошуп, яхшы кюйде булгъайбыз. Шо сувну ичине шишаны ярым сагьатгъа чомабыз, сонг губка булан ишып, чайып, къурума салабыз.
- Дорбаны ичиндеги картоп оьзек ачмасын учун, картопну арасына алма салабыз.
- Жиени ва баълини дамгъалары опуракъдан къыйын тая, неге десе о емишлердеги натуральный боявлар къумачны ичине бек сингип къала. Амма шогъар да эп этме бола. Лимон кислотаны ва соданы гьарисин гиччи къашыкъ булан алып, къайнар сувгъа къошабыз, реакция башланып, булгъангъаны бокъурлап йибережек. Шону ичине батгъан опуракъны беш минутгъа салсакъ, дамгъа таяжакъ.
- Бир-бирде холодильникни ичин къолгъа ябушагъан майдан тазалама герек бола. Шону учун эки уллу къашыкъ опуракъ кондиционер ва бир уллу къашыкъ соданы бир-бирине булгъайбыз. Кондиционер майны ирите, сода буса майну тайдырмагъа кёмек эте. Губка булан онгаргъан къошулчаны (смесь) майны уьстюне сюртюп, бир нече минутгъа къоябыз, сонг сибирип тайдырабыз.
- Сувлу чакъда аякъгийимлерибиз ташны, балчыкъны, плитканы яда бузну уьстюнде сыргъаламас учун не этмеге тарыкъ? Силикон герметик алып, аякъийимни ултанына шону гьыз-гьыз этип сюртебиз (нечик сюртсек де ярай). Герметик къуругъанда аякъгийимлер сыргъаламайгъан болажакъ. Эгер аякъгийимлеге алдагъы гьалны къайтармагъа сюйсек, герметикни хас алат булан тайдырма тарыкъ.
- Ону-муну тазалайгъан арив зат этмеге сюйсек, шону оьз къолубуз булан натуральный сурсатлардан этмеге болабыз: эки уллу къашыкъ соданы, эки уллу къашыкъ сувлу сапунну ва эки уллу къашыкъ горчица порошокну бир-бирине булгъайбыз. Болгъанындан печни уьстюн, терезени шишасын, раковинаны ва шолай оьзге затланы бек арив тазала бола. Ондан къайры, горчица бактерийлени де оьлтюре.
