Исси гийинебиз! Къайсы пуховик яхшыдыр?
Исси гийинебиз! Къайсы пуховик яхшыдыр?
Къыш гелген, энни исси гийинмеге тарыкъбыз. Дагъы ёгъесе уьшютеген ел, йибитеген янгур, бузлатагъан къар къаркъарабызны сан-санын ачытдырар, гьалыбызны ва гёнгюбюзню бузар. Аявлу къатынлар, чакъгъа гёре опуракъны гьайын этмеге герекбиз.
Нечик болса да, къырдагъы гьалиги гьал бизге яман таъсир этмес, неге десе тунукъ гюнлерден сонг гюнешни шавласы исиндиреген заман да гележекни билебиз. Аслусу – салкъынлыкъны юрегибизге гирмеге къоймайыкъ, уьстюбюзню буса, исси этме кюй табарбыз. Айтагъаным, онгайлы ва чакъгъа гёре опуракъ онгарма болсакъ, къалгъан затны эби табылар. Бугюн пуховик нечик сайлама болагъанны гьакъында хабар этме сюемен.
Ичинде не бар?
90-нчы йылларда халкъ гиеген пуховиклер ренкли уллу ювургъанлагъа ошай эди. Шоланы гийип юрюйгенлер шишген топ йимик эди. Гьалиги заманда сувукъдан сакълайгъан, янгурдан къоркъмайгъан алай арив гёрюнюшлю курткалар эркин бар. Олар енгил де дюр, жувма да боласан. Пуховик сатып алагъанда агьамият берилмеге инг биринчи зат – ичинде не барны билмек.
Къув (пух) ва къуш тюк (перо) алдан берли къоллана. Бу бек арив исси эте, тек куртканы дурус кюйде гьайын этмесе къыйматлыгъын тас этмеге бола. Шолай пуховикни жувагъанда порошокну орнунда гель къолласа яхшы ва опуракъ кондиционерни къоллама тарыкъ тюгюл. Опуракъ жувагъан машинни ичине бир-нече теннис топ яда хас шариклер салса, къув басылып къалмасдан сакъланар. Амма жувгъан сонг къув басылгъан буса, шону янгыдан «шишдирме» бола. Халиден чанг къагъагъан чубукъ булан пуховикни «токъаласа», шо яп-янгы болажакъ.
Къойну юню (овечья шерсть) – бирдагъы герти толтуруш (наполнитель). Бу бек исси, тек бираз авур ва аллергиягъа гелтирме бола.
Синтепон толтурушланы эсгиленген къайдасы санала. Бир жувгъандокъ о гёрюнюшюн тас. Ондан къайры, исси эте буса да, ону гиеген адамны къаркъарасы терлей.
Холлофайбер – синтепонну янгыртылгъан къайдасы. Холлофайбер булангъы куртканы жувмагъа ярай, огъар бир зат да болмай, гёрюнюшюн тас этмей, тек синтепон йимик терлете.
Изософт. Муну булан ичин толтургъан курткалар бек енгил, бузулмай хыйлы йыл къуллукъ эте, янгурдан къоркъмай, тек багьасы башгъаларындан эсе шайлы артыкъ.
Къыр якъда недир?
Къыш опуракъны сатып алагъанда къумачны къалынлыгъына агьамият беригиз: толтурушу гёрюне буса, булай гийим узакъ заман къуллукъ этмес. Ичириги тийгенде арив, герти (натуральный) къумачдан тигилген болмагъа герек. Сатин яда байка къумачлар тез бузула. Ичирик хас къумачдан тигилген буса яхшы. Пуховикни замогу уьстюнден къумач ва кнопкалар булан ябыла буса яхшы: сувукъдан ва елден къолай сакълар. Гьыз-гьыз этип тигилген (стёганый) курткалар узакъ къуллукъ этежек. Ичи герти толтурушлу къурткаланы уьстю шолай гьыз-гьыз этип тигилмек борч, синтетическийлени – этсе яхшы. Бойнунда, белинде, тюбюнде хас чалывлар, къалын йиплер бар буса, къуртка къаркъараны сувукъдан бек сакълар. Бек къысгъа къуртканы орнунда тобукълагъа етишегенин яда белинден тюпге тюшегенин сайламакъны ёрар эдик.
Сонг, мода къаламы?
Биз, тиштайпалар, онгайлыкъдан къайры арив гёрюнюшню гьакъында да ойлашабыз. Гьалиги заманда ялгъан териден (экокожа) этилген къара тюслю пуховиклер арив санала. Бютюн гёрюнюш къара тюсде болмакъ мода гьисаплана. Шолай пуховикни учлары итти, табаны бийик тюгюл этиклер, къара капот булан гиймеге ярай. Явлукъ ва къолгъаплар тийишли тюслю болса яхшы. Къара тюсню ушатмай бусагъыз, енгил боямыш, сютлю шоколадны яда шолагъа ошашлысын сайлама ярай. Шолай тюсдеги курткагъа къалгъан опуракъны къыйышдырмагъа къыйын болмас. Дурус гийинмеге уьйретегенлер айтагъан кюйде, бютюн опуракъ бир тюслю болмаса яхшы. Шону орнунда бир тюсдеги опуракъ авур ва енгил тюслени къуршап жыйылгъан буса, арив болар. Башлыгъы булангъы курткалар не заманда да арив гёрюне, оланы узунлугъу къаркъарагъа гёре тюрлю-тюрлю болма ярай. Авур яшыл тюсдегилери (хаки) гьалиги заманда айрыча агьамиятлы санала.
