Италиялы къатынлар тазалыкъ болдурагъан кюй
Гьар пачалыкъны, гьар миллетни – оьз маданияты ва адатлары бола, яшавлукъ юрютеген кюю де башгъа. Ер юзюне ягъадан къараса, уьйлерин тазалайгъан ва ожагъын онгарагъан бал жибиндей чалышагъан хыйлы-хыйлы тиштайпаны гёрербиз.
Гьар къатынгишини яшыртгъын сырлары бола. Бугюн италиялы къатынгишилер тазалыкъ нечик болдурагъанны ачыкъ этербиз.
Италияда ожакъны ва агьлюны уллу къыйматы бар. Бу пачалыкъда уьй хозяйкалар оьз къуллукъларына тетикли янаша ва бир тепсини айланасында кёп санавдагъы къардашларын жыймагъа нече де сюе.
- Итивден айрылмай. Италияда бары да опуракъ яхшы кюйде итив урулгъанны бек ушата. Бары да затгъа итив ура, гьатта чораплагъа да.
- Уллу халчаланы сюймей. Италиялы тиштайпалар ковролинни гёрюп ярамай ва уллу авур халчаланы да къабул этмей, неге тюгюл оланы къыргъа чыгъартып, чангын къакъмагъа ажайып четим масъала. Шолай ер яйывлар тазалыкъ болдурмагъа онгайсыз санала ва гьатта лап гючлю пылесос да оланы тарыкъ кюйде тазаламас. Кёбюсю гьалда олар енгил халилени къоллай. Шоланы сюйген заманда жувмагъа ва къурутмагъа бек онгайлы.
- Гьава учун атир ийислени къолламай. Италияда «освежителлер» кёп аз къоллана. Ерли къатынлар гьисап этеген кюйде, уьй таза буса, гьаваны атир ийис булан безендирмеге тарыкъ да тюгюл.
- Уьй ашны ушата. Бу пачалыкъда ашамагъа кёп сюе ва дамагъын чыгъартып ашай. Италиялы къатынлар ашуьюн кёп ва татли аш этмеге болагъан кюйде онгара. Кёплени уьюнде эки холодильник бола. Къатынгишилер шонда пицца учун хамур ва макаронгъа гьазир тузлукъ сакълай.
- Уксус булан жува. Италияда опуракъ жувагъанда кёбюсю гезикде сирке ханц (уксус) къоллана. Уллулардан гелген бу «гьилланы» яхшылыгъындан опуракъ йымышакъ ва тап-таза бола. Опуракъ жувагъан машинни ичине порошок булан бирче тазалангъан акъ уксус къошула.
