Къара ва акъ тюслю опуракъ не заманда да арив гёрюне
Къара ва акъ – бу эки де тюс кимге де къыйыша, не заманда да къолланмагъа бола. Ала-къула ренклерден ялкъгъанда гьар тиштайпа учун бу эки де тюс арив кёмекчи. Яш къызъяш, орта оьмюрдеги ва уллу чагъындагъы тиштайпа – гьариси бу эки тюс сайласа утдурмас. Къара ва акъ – не девюрге де къыйыша.
Бир башлап къатынгиши акъ тюсню къайсы къайдасы оьзюне къыйышагъанын сайлама тарыкъ, неге десе акъны гёкшылт, боз яда сариге тартагъан ренклери бола. Бетигизге къайсы ошайгъанын танглагъыз – сют тюслюмю, ап-агъымы, саргъылт агъымы. Умуми опурагъыгъыз бир тюсде буса, къайсы къумачдан тигилгениси айрокъда агьамиятлы бола. Шо саялы багьалы къумачдан тигилгениси, тюймелери де гёрмекли болмакъ яхшы. Багьалы къумачдан тигилген акъ гёлек боз тюсге тартагъан гёлекден эсе къолай санала.
Бютюн опурагъыгъыз акъ ва къара тюслю буса, шону тигилген къайдасына, къаркъарагъа къыйышагъан кююне таяныгъыз. Шолай этсегиз, тыш гёрюнюшюгюз айрокъда исбайы болажакъ. Булай опуракъда эки де ян бир оьлчевде болмаса да ярай. Къолланы уллулугъу, «бюрюшген» къумач, къысылгъан къайдалар да арив гёрюнеген кёмекчилер. Къарасы кёпмю, агъы кёпмю – гьар ким оьзю сайлай. Амма лап арив къайда – яртысы къара, яртысы акъ буса. Масала, тюп яны – къара, оьр яны – акъ (яда терсине). Олай да, бир тюслю опуракъда башгъа тюсден къошумлар да арив гёрюне. Опуракъ не къумачдан тигилгенге ва къаркъарада нечик гёрюнегенге айрыча агьамият бермеге тарыкъ. Масала, замша ва чилле бир-бирине арив къыйыша. Кетен ва вельвет де бир-бирине къыйыша ва исбайы гёрюне. Бираз «енгил» гёрюнмек учун, юн къумачны тери булан къошса арив. Демек, бир тюслю тюрлю къумачлар бир-бирине къошулагъанда, тиштайпаны тыш гёрюнюшю «ойнап» йибере.
Къара ва акъ тюслер бир къумачдагъы заманда да исбайы гёрюне. Масала, акъ-къара тюслю чачма къумач тиштайпагъа ал заманларда йимик гёрюнюшлюк бере, исбайлыгъын гёрсете. Олай да, гьыз-гьыз къумач яхшы: генг, тар, узунуна ва гёнделенине. Гьыз-гьызлы къумач къаркъараны исбайы этмеге де, бираз базыкъ этип гёрсетмеге болагъанны да унутмагъыз. Челтир (клетка) къолламакъ да ярамай тюгюл. Зебра териге ошатып этилген сурат да къатынгишилеге арив къыйыша.
Эгер не заманда да къыйышагъан опуракъ излей бусагъыз яда гьар гюн не гиейим деп ойлаша турма сюймей бусагъыз, акъ ва къара тюслю опуракъгъа агьамият беригиз, шону кёмегинден пайдаланыгъыз.
Арив гёрюнмек учун, акъ ва къара тюслю опуракъ шо аз буса да, нечакъы да таманлыкъ этегенни англама къыйын тюгюл.
