Тиштайпалар бош заманын йибереген кюйлер
Гьар къатынгиши де яхшылыкъ гелтиреген ва жагьлыгъын артдырагъан билимге ес болма сюедир. Бош заманын пайдалы кюйде йиберме бажарагъан тиштайпа оьз пагьмусун арагъа чыгъарма да, къазанмагъа да бола. Биревлер не булан машгъул болмакъны биле, башгъалар не этейим деп токъташып битмеген. Хасиятына ва къылыгъына къыйышагъан кюйде бош заманын йибермеге гьар ким оьзю не сайларны нечик билсин?
- Нени ушатагъанны гьакъында ойлашайыкъ.
Бир башлап ушатагъан ишлерибизни ахтарып къарайыкъ. Бош заманыбызны нечик йиберме сюебиз? Яш ва жагьил йылларда нени кёп сюе эдик? Бу иш яратывчулукъ, спорт, баш ишлетив яда табиат булан байлавлу зат болма ярай. Шо гьакъда башыбызгъа гелген бары да ойланы язайыкъ.
- Янгы ишни сынап къарайбыз.
Янгы ишни сынап къарамакъдан къоркъма тарыкъ тюгюл, шо къужурлу деп къабул этейик. Бир тамаша ишни ушатып къалмакъ бар. Согъув, бийив яда уьйде оьсюмлюклер оьсдюрюв булан машгъул болма къарайыкъ. Олай да, сурат этив яда балчыкъдан савут-саба этмеге уьйренейик. Нечик алай да, жагьлыкъ береген «касбу» излейбиз.
- Яшавну барышын гьисапгъа алабыз.
Бош заманыбызда не иш этежекбиз, деп ойлашагъанда яшав барышыбызны гёз алдан тюшюрме ярамай. Бош заманыбыз кёп тюгюл буса, артыкъ гьаракат талап этмейген ишни сайлайбыз. Масала, китап охув (шону ичинде онлайн-китапханаларда), медитация, дневник юрютюв яда янгы тил уьйренив
- Бизин йимик ойлашагъанланы табабыз.
Оьзюбюз йимик ойлашагъан адамлар булан къатнав жагьлыкъ артдыра. Соцсетлерде яда онлайн къайдада иш гёреген гьар тюрлю клублагъа, гюплеге къошулув пикру алышдырывгъа, кёмек гёрювге ёл ача.
- Гьар тюрлю чагъындагъыланы бош заманын йиберивю.
Жагьил тиштайпалагъа янгы тилге уьйренив, сурат этив, сурат чыгъарыв яда ашбазлыкъ къыйышар. Бу ишлер яратывчулукъ пагьмуну артдыра ва уьстевюне къазанмагъа да имканлыкъ бере.
Орта оьмюрдеги тиштайпалагъа къаркъараны жагьлыгъын сакъламагъа кёмек этеген ишлени сайласа яхшыдыр. Шоланы арасына гимнастика, юзюв ва шо кюйдеги оьзге спорт ишлер гире. Шондан къайры, согъув яда тигив да къыйыша – арив де, пайдалы да дюр ва нервалагъа да яхшы.
Уллу чагъындагъы тиштайпалар тарих, инче саният яда адабият булан байлавлу ишлеге «чомулма» бола. Янгы тилге уьйренив, музейлеге барыв ва китап охув гьакъыл даражасын артдыра ва къужурлу ишлерден де дюр.
