Яшлары кёп аналаны ёравлары
Яшлары кёп аналаны ёравлары
Кёп яшлы агьлю недир? Бетинде иржайыву таймайгъан, ачыкъ тюслю гёлек гийген ва ашуьйде айланагъан ана; буссагьат атылып туруп, яшлары булан къыргъа чыкъмагъа даим гьазир турагъан жагь ата; чачы таралгъан къызлар; таза гёрюнюшлю уланлар.
Амма яшавда шолаймы экен? Яда кёп яшлыкъ – битмейген къавгъа, низамсызлыкъ, кюлкю, йылав, нервалар, бош холодильник ва юхусуз гечелерми? Гьакъыкъат ортададыр. Кёп яшлы агьлю оьзгелерден къалышмайдыр, тек мундагъы къыйынлыкълар ва яхшылыкъ башгъалардан эсе уьч, дёрт яда беш къат артыкдыр… Кёп яшлы ата-ана сынав, чыдамлыкъ, гьатта масхара билегенлик булан да хыйлылардан озар.
Бугюн кёп яшлы беш тюрлю ана булан лакъыр этебиз. Оланы ёравлары бир яда эки ва кёп яш тапмагъа сюегенлеге пайдалы болур деп эсибизге геле.
Марьям, аявлу дёрт къызны анасы: «Айырып, нечик буса да бир ёрав бермек къыйын болур. Больницадан чыкъгъан гюнден башлап къызларым школагъа баргъан чакъы заманны алып, шо гьакъда язса, къалын китапгъа чакъы язмагъа зат болажакъ. Оьзюм учун гюн нечик башланагъаны агьамиятлы экенни англадым. Барысындан да алда туруп, аш онгарып битип, терезеге багъып, шыплыкъдан леззет аламан. Ярым сагьат шолай рагьат турмагъа болсам сав гюнге чыдамлы боламан. Ашуьйде низам болмакъ бек агьамиятлы. Яшлар уьйден гетегенде мен этилмеге герекли ишлени алданокъ белгилеймен: нени этмек, уьйден нечеде чыкъмкъ, оьзюм булан нени алмакъ. Ахшам буса, телефонумда гележек гюнге план къураман. Шолайлыкъ яшавумну тынч эте».
Диана, уьч къоччакъ уланны анасы: «Бир-бирде бу эркек «пачалыкъдан» арыйман. Оюнчакъ машинлер, тапанчалар, гёлеклер ва иштанлар. Амма олардан аявлу зат ёкъ. Гиччим ал гюллер савгъат этегенде йимик, бир бет булан, орам бойда юлкъгъан от гелтирегенде бир гьал бола.
Бары да аналагъа лап аслу ёравум – гьалсыз даражагъа етмеге къоймагъыз оьзюгюзню. Арыгъан, талгъан бусагъыз, янгызлыкъда ял алмакъ учун не этип де имканлыкъ табыгъыз. Эригизни, уллананы яда оьзге къардашны кёмекге чакъырып, яшлагъа къарасынлар. Олар яшлар булан турагъанда оьз гьайыгъызны этигиз. Шолай этип болагъаным магъа хыйлы замангъа сонг гюч бере».
Загьидат, етти яшны сынавлу анасы: «Мени яшларым оьсюп уллу болгъан, олар оьз яшлары булан бизге гелегенде кёмек де эте. Жагьиллеге сабурлу, чыдамлы болугъуз деп айтар эдим. Гьали сизге шо сёзлер кёмек этмесдир, тек бир гюн гележек сиз олагъа оьзюгюзню гесек-гесек этип берегенигиз токъталажакъ, некъадар олардан гьай этив, языкъсыныв ва сююв гёрерсиз. Къызым биринчи гезик аш биширгенде мен шолайлыкъны сездим. Кёп яшлы агьлю – Есибизни савгъаты».
Ольга, уьч баланы анасы: «Мени уьч авлетим бар, уллусу – улан ва эгиз къызларым. Яшлар булан бек къыйын, эримден кёмек болмагъан эди буса, тайышар эдим.
Мени йимик аналагъа не ёрайым? Бизин учун яшлар авруса, лап къыйын бола. Яшлар бавундан оланы бириси сувукъ тийип гелсе, къалгъанларыбызгъа да югъа. Ана авруса чы бирден-бир яман бола. Шо саялы яшлар аврумасын учун оланы иммунитетин беклешдирмекге бек агьамият беремен. Чакъгъа да къарамай, гьар гюн къыргъа чыгъабыз, витаминлер беремен, татлини аз этемен, овошлар кёп ашатаман, артыкъ исси гийиндирмей ва уьюбюзге терезе ачып таза гьава гийиртемен. Булай алгъанда, шоланы билмейген гиши ёкъ, тек этмеге унутуп къала буса ярай. Ана сав гюн телевизорну алдында янтайып, яшлар дёрт тамны ичинде турмагъа ярайгъан зат тюгюл».
Хадижа, беш яшны анасы: «Агьлюбюзде бир-бирибизге кёмек этебиз, янын тутабыз. Яратгъаныбызны кёмеги булан оланы билеген кюйде тарбиялайман. Эрим оьлген, тул къатынман. Бавубуз, сыйырларыбыз бар ва ишсиз турмагъа бажарылмай. Арыгъанымны гёрсе, уллуларым шоссагьат мени ял алмагъа йиберип, оьзлер иш битдире. Эришивлер де болмай къалмай, тек биз масъалаларыбызны ич арада чечмеге бажарабыз. Эришсек, урушсакъ, сонг гечмекни тилеп, ярашабыз, къучакълашабыз. Гьар намазымдан сонг Есибизден тилеймен яшларымны яхшы адамлар этип оьсдюрмеге имканлыкъ берсин деп. Булай агьлю берген саялы Яратгъаныбызгъа гьар заман шюкюрлюк де этемен. Къатынгишилеге шулай айтар эдим: яшларыгъызны оьзюгюз яда олар учун оьсдюрмегиз, Аллагь ﷻ учун оьсдюрюгюз ва талайлы болурсуз».
