Гьижап гиймекге он себеп

Гьижап гиймекге он себеп

Бир-нече йыллар алда мен гьижап не экенни билдим ва шондан берли Аллагьны ﷻ яхшылыгъы булан бу опуракъны юрютемен ва шогъар бек сююнемен. Бугюн буса, дин къызардашларыбыз къаркъарасын не учун яшырмагъа герекни гьакъында язмагъа сюйдюм. Бу маълумат бары да тиштайпаланы бу кепде гийинмеге ругьландырар деп умут этемен.

Не учун гьижап гиебиз?

1.Гьижап – Есибиз Аллагь ﷻ къатынгишилеге салгъан борч.

2.Яратгъаныбыз бизден талап этеген бары да ишлерде уллу пайда бар, гьатта биз шо гьакъда билмесек де. Масала, доктор яздыргъан дарманланы ушатмасагъыз да ичесиз чи, шону аччылыгъына къарамайлы, неге десе о савлукъ учун пайдалы экенге инанасыз. Олай болгъан сонг, Есибиз талап этеген ишлеге инанмай нечик болабыз, шолар чы бютюнлей бизин пайдабыз учун.

3.Есибизге ювукъ болмакъ учун лап яхшы иш – Ону буйрукъларына таби ва гьакъ юрекден юваш болув. Гьижап юрютювде къатынгиши учун хыйлы яхшылыкъ бар, мен шону байламагъа башлагъандокъ шоссагьат гьис этдим – ич гьалым ёрукълу болду ва оьзюмню парахат гёреген болдум.

4.Гьижап – къатынгиши учун ругьну нюрю, неге десе ону ругьун оьсдюре ва якълай. Гьижап – иманны белгиси. Шо дюр Есибиз Аллагь ﷻ къатынгишилеге берген ажайып уллу ниъмат.

5.Гьижап гюч бере. Бирев де къаркъарангны гёрмей, бары да зат яшырылгъан. Янгыз бетинг ва къолларынгны аялары ачыкъ, оьзге якъ мекенли бегилген. Шолайлыкъ булан Есибиз Аллагь ﷻ тиштайпаны аман сакълай ва оьр эте.

6.Бусурманлар айлана якъ нени ушата буса, шогъар ойлашмай авуп къалмагъа герекмей. Иманы бар тиштайпа моданы артына юрюймен деп дазудан чыкъмас, неге тюгюл кимесе пеленче айтагъанны Есибизден гелеген буйрукъдан артыкъ гёрмей. Булай къатты кюйде оьзюню динин сакълайгъанлыкъ, терсине чыгъып, оьзгелер гьижапгъа гьюрмет этип, огъар къыйышагъан кюйлени, моданы чыгъара. Гьалиги заманда айтылгъан модельерлер бусурман тиштайпалар учун опуракъ тигегени кёп болуп бара.

7.Адамлар къатынгишини къаркъарасына бакъмакъ дегенден гьижап аман сакълай. Бу «перде» тиштайпаны аривлюгюне багъып къалмай, ону гьакъылына агьамият бермеге кёмек эте. Бу опуракъ ону булан ишлейгенлер ону оьзюне тюгюл, гьаракатына агьамият береген кюйню эте.

8.Бизин къаркъарабыз – Есибиз бизге аман сакъламакъ учун берген аманат ва ругьубуз ону ичинде даим къалмажакъ, шо саялы огъар буюрулгъан кюйде янашмагъа герекбиз. Дюньяда айтылгъан, белгили докторлар да гьижапны уллу пайдасы баргъа мюкюр бола.

9.Саламатлы болмакъ деген буйрукъ бютюн инсанлагъа тие. Къатынгишилер саламатлы гийине, эргишилер буса, къаравун ерге бакъдыра. Шолайлыкъ булан бир-бирибизге жамиятдагъы тазалыкъны сакъламагъа кёмек этмеге герекбиз. Натижада, пасатлыкъгъа ер къалмас.

10.Динни къанунлары – къыйматлыгъыбызны аман сакъламагъа кёмек этеген Есибизни буйрукълары. Тиштайпаны гьижабы – ону якълавчусу ва безендиреген аривлюгю, ону гючю ва савуту, ону иманы талап этеген ёлу ва ругь эркинлиги. Яратгъаныбыз бизин учун гёрсетген бары да буйрукъланы кютмеге болсакъ, яшавубуз маъналы, толумлу ва насипли болур, Аллагь ﷻ буюрса.

САИДА ИБРАГЬИМОВА