Юхлап тоймайгъанда не этсе яхшы?
Юхлап тоймайгъанда не этсе яхшы?
Гезев, байрамлагъа гьазирленив, яшлар авруйгъаны, ишдеги кёп иш – булар барысы да инсанны юху булан байлавлу токъташгъан мердешин бузмагъа бола.
Юхусуз гече болса, кёплер гюндюз юхламакъ булан юхудан тоймагъа къарай. Амма ахтарывлар ачыкъ этеген кюйде, бу къайда пайда бермей, неге тюгюл гюндюз юху къаркъараны юхудан тойдурмай. Юху булангъы бу масъаланы чечмеге кёмек этежек бугюн бир-нече ёрав бермеге сюебиз.
- Ярыкъгъа агьамият беригиз.
Юхугъа батмакъ уьйдеги ярыкъ булан тувра байлавлу. Ярыкъ тайып къарангы болагъан заманда адамны баш майы къаркъара юхугъа батмагъа герекни билдире. Юхламагъа ятгъанча эки-уьч сагьат алда компьютерни алдындагъы ишигизни битдиригиз, телефон къоллавну токътатыгъыз. Неге тюгюл шолардан баш майыбызны гьалек этеген гёк ярыкъ геле. Гьатта кёп сюеген телефонсуз юхугъа батмагъа болмай бусагъыз, гечеги режимни сама ягъыгъыз. Олай этсегиз гёк ярыкъ тюгюл, сари ярыкъ янажакъ.
- Ятагъанда ашамагъыз.
Ятгъанча алдын кёп ашамакъ – юхугъа къыйын батажакъны токъташгъан себеби, эртен буса, авур уяныв болажакъ. Геч аш хапмакъдан, чай ичмекден къутулмагъа гьаракат этигиз. Къаркъарабыз учун аш ашавну лап дурус болжалы – эртенги ва гечеги ашны арасында 12 сагьат гетмек. Гьар гезик гече артыкъ ашайгъан заманда, къаркъараны мекенлешип ишлейген кююне басгъын этегенде йимик бола.
- Гюндюзлер 30 минутдан артыкъ юхламайбыз.
Гюнлюк режимни ёрукълу этмек учун, гюндюз юхуну къоймагъа тарыкъ. Эгер юхудан гёзлер юмулагъанны ва тёшекге тартагъанны гьис эте бусагъыз, таза гьавагъа чыгъып, бираз зарядка этсе яхшы болур. Амма гюндюзлер 30–40 минут юхлагъан булан, гюнлюк режимибиз бузулмайгъанны билмеге тарыкъ, тек режим токъташгъанча шолай этмесе яхшы.
- Алгъасамагъыз ва муратларыгъыздан айрылмагъыз.
Режимни ёрукълу ёлгъа салмагъа къыйын болгъанда кёплер къол силлеп, гьаракатын токътата. Амма режим ёрукълу ёлгъа тюшмек учун, 30–40 гюн тарыкъ болагъынын билмеге тийишли. Гёз алгъа тутулгъан муратгъа етишгенче, гьар гюн режимни 10–15 минутгъа алышдыра туругъуз.
