Енгил ашлар
Имканлыкълар эркин заманда не аш биширмеге де рагьат болурну къайсы уьй хозяйка да бек яхшы биле. Амма бир-бирде хапарсыздан къонакълар гелип къала, тек уьйде шо заман таман чакъы сурсат болмай къалмакъ бар, тек не этип де гелгенлени ашатып, гьалдан чыкъмагъа тарыкъ чы.
Олай да алапа битип, холодильник бошагъан кюйде къалагъан гезиклер де бола. Булай гьалларда, къолда бар ашамлыкълар булан агьлюню нечик тойдурмагъа бола деген масъаланы чечмек учун, бир-бир пайдалы ёравлар тарыкъ болмай къалмасдыр.
Акъча къытлыкъ заманда ва эркин ашлар этмеге чола ёкъда янгыз макаронгъа «гёчмеге» тюшежек деген ой гелип гете. Амма сюйген затны сатып алмагъа болмасакъ да, тепси къурувда къутсузлукъдан сакъланагъан кюйлер кёп бар. Этни, чабакъны, емишлени тюбюкъарадан унутуп къоймагъа тарыкъ тюгюл, оланы башгъача къоллап уьйренмеге тарыкъ.
Бугюн этден этилеген учуз олтурагъан ашланы гьакъында айтайыкъ.
Аз акъча булан этден тоймакъ учун тавукъ яхшы санала. Лап яхшысы тавукъну савлай алып, сонг гесип, бёлюп пайламакъ. Акъ этинден диетический ашлар гьазирлене, ону туврама да ярай. Бу къушдан биширмеге болагъан хыйлы кюйлер бар. Шолардан бирлерин эсигизге салайыкъ.
Тавукъдан этилеген котлетлер учун кёп согъан, самурсакъ, специялар, бираз экмек тарыкъ. Майлы болсун учун, увакъ этилген морков яда къапуста къошмагъа арив болур.
Тавукъ этден этилген долма – бираз дюгю къошгъан булан яман болмас, некъадар татувлу ва токълу болур. Мунда къушну ич санларын къошуп, къолламакъны да унутмайыкъ.
Тавукъ юреклени овошлар булан бишире яда бавурлардан этилген паштет – ожакъдагъылар барысы да ушатар татли ва енгил этилеген ашлардан.
Тавукъ къанатлар да багьалы тюгюл, амма олардагъы эт йымышакъ ва татувлу бола. Алданокъ специяланы ичинде булгъап, печни ичинде ону картоп ва согъан булан биширсе, уьйдегилер кёп сююп ашар: бек татли аш.
Саркъа биширилген (тушёный) къапуста булан тавукъ эт – майлы, татувлу ва пайдалы ашлардан болур. Шону булан ювукъ адамларыгъызны сююндюрмеге унутмагъыз.
Этни аявлап къолламагъа сюе бусагъыз, сезонгъа гёре оьсеген овошланы кёп къолламакъ, ашгъа къошмакъ тарыкъ болур. Шо саялы этни аз къошуп, согъанны, морковну, бадиржанны кёп этсе, эркин аш болур. Баву барлар топуракъда оьсеген оьсюмлюклени шо кюйде генг къолламагъа бола.
Гьайван бавурладан да учуз олтурагъан татли ашлар этмеге бажарыла. Бавурдан этилген котлетлени яшлар да кёп сююп ашар, гьатта бавурну сюймей буса да. Шогъар картоп яда гречка къошмагъа ярар.
Гёресиз, ойлашып къараса, гьар уьй хозяйка да татувлу тюрлю-тюрлю ашлар биширмеге бола, имканлыгъыны тарлыгъына да къарамайлы.
