Аралыкъланы беклешдиреген дёрт сорав
Аралыкъланы беклешдиреген дёрт сорав
Янгы агьлю къурулагъанда эр-къатын аралыкълар денгиздеги толкъун-толкъун йимик бола, бир-бирин таныв ва уьйренив ажайып иш. Амма бара-бара арадан иттилик тая, сюювню къайнарлыгъы да басыла ва бирчеги яшав уьйренчикли гьалгъа айлана.
Озокъда, бары да агьлюлер бир йимик болмай ва биревлер сюювню ялынын узакъ йыллагъа сакъламагъа бажара. Шолай неден бола экен? Насипли эр де, къатын да сюегенлигин гёрсетмеге къоркъмай, иссилигин къызгъанмай ва бир-бирине гьюрмет этип де бола. Бир-биревню англамагъа ва гелишли яшамагъа кёмек этер йимик дёрт соравну тёбенде язмагъа тийишли гёрдюк.
1. «Менден не савгъат алмагъа сюер эдинг?»
Булай тувра ва ачыкъ сорав хыйлы хатиржанланы ва эришивлюклени басылтмагъа бола. Оьз умутлары гьарибизни бар, тек биревлер шону белгилемеге уяла, башгъалар нечик айтагъанны билмей къала. Олжалар бирбирини сюйгенин билгенде, шону яшавгъа чыгъармагъа болагъан кюйлени гьакъында ойлашар ва натижада аралыкъ беклешерге шеклик ёкъ.
2. «Агьлюден тышда не тарыкъ сагъа?»
Эр-кътынны аралыгъы нечакъы яхшы болса да, оланы гьариси бютюн дюньяны орнун тутмагъа болмайгъанны англамагъа тарыкъ. Демек, олжаны къайсыны да агьлюден тышдагъы оьз яшаву болмагъа бола. Масала, янгызлыкъдагъы гезев, къардашлары булан къатнав, юреги авагъан иш булан машгъул болув ва шолай башгъалары. Булай гьал агьлю яшавгъа яхшы якъдан таъсир этсе тюгюл, бирт де зарал гелтирмес.3. «Умутунг не зат булан байлавлу?» Заманны бираз артгъа айландырып къарайыкъ. Мисал учун, етти йыллар алъякъда биз нечик эдик? Гетген йыл ойларыбызны не зат къуршай эди? Б
угюнгю гьал нечикдир? Гьислерибиз, ойларыбыз, муратларыбыз даим алышына. Олжаларыбыз булангъы гьал да лап шолай. Оланы ойлары ва умутлары алышынмагъа бола. Шо алышынывлар не зат булан байлавлу, гьали яшав ёлдашы не гьакъда ойлашагъанны билмек бек агьамиятлы. Билген булан болуп къалмай, ёравчу ва кёмекчи болуп болма да гьажатлы.
4. «Гьалынг, кепинг нечикдир?»
Бу сорав оьтесиз простой, тек ойлашып къараса, гьакъ юрекден жавап болургъа умут булан шону артдагъы гезик къачан берген экенбиз? Мюкюр болмагъа герекдир, тек эр де, къатын да бирбирине бакъгъан якъда лап ювукъ адамлар ва якълавчулар. Олай да, олжалар шу дюньяны гьар-тюрлю къыйынлыкъларындан бирче баш гечирегенлер, кёмек этегенлер. Сюеген, аявлу адамынг булан не болуп турагъанны гьакъында билмек, огъар юреги авруп, не кёмек этмеге боламан деп ойлашмакъ бек агьамиятлы ишлерден экенни унутмагъа тюшмей.
САФИЯ ФОКИНА
Алмадан татлилик
Кюйге къарагъанда, бу йыл алма яман болмады. Биревлер кампотлар, мурапалар эте, биз буса алмадан тез бишеген бир татлилик этеген кюйню гьакъында бугюн язмагъа сюебиз.
Не зат тарыкъ: эки алма (къайсы сорту да къыйыша); 1 уллу къашыкъ лимон сок; 1 йымырткъа; 30 грамгъа ювукъ шекер; 1 гиччи къашыкъ ваниль экстракт; 50-60 грам ун. Этеген кюй: Алмаланы жувуп, ортасын гесип тайдыра, къалгъан янын тёркадан чыгъара (сюйсе къабугъу булан, сюйсе арчылап). Сонг сыгъып сувун тайдыргъанда шогъар лимон сок да, шекер де къоша ва булгъай. Ондан сонг, ванилни экстрактын да, йымырткъа да къоша ва булгъай. Эленген унну да къошуп янгыдан булгъай. Шолай булгъангъан хамур, йымышакълар этилегенде йимик, даражада болмагъа тарыкъ. Къызгъан ялгъавгъа урлукъ май тёге ва уллу къашыкъ булан шо болгъан хамурдан къызмагъа сала. Бек исси де, аста да тюгюл отдагъы ялгъавда хамурну эки де янын къызарта. Бишген татлиликни тепсиге бал, къаймакъ яда мурапа булан сала.
