Эртенигиз берекетли болсун учун 5 ёрав
Бу гьалекли дюньяда парахатлыкъны къайда излейик? Озокъда, уьйде. Къайсы пашманлыкъны да басылтмагъа болагъан уьйню есилери буса, – бизбиз, къатынлар!
Гюн башлангъандокъ, танг къатгъан сонг ювукъ адамларыбызгъа сююв, гьайын этив, иссилик савгъат этмеге болсакъ, олар гюнню къалгъан янында не къыйынлыкъгъа да, авурлукъгъа да бюдюремей къаршы турмагъа болажакъ. Эртенокъ ожакъда яхшы ва енгил гьалны тувдурмагъа болардай бир-нече ёравну гьакъында айтайыкъ.
- Яхшы эртенни ахшамдан тутуп гьазирлейбиз. Тиштайпа гече 12-ден сонг юхламагъа ята буса, жагьиллигине ва аривлюгюне душман бола. Къаркъарагъа герекли къатын гормонлар ишленмек учун 11 болгъанча ятмагъа тарыкъ. Юхудан даим тоймайгъан адам гьалек бола, къарыву тая, къаркъарасы авур тарта, тыш гёрюнюшю аривлюгюн тас эте.
- Тиштайпалар аналар, къатынлар болуп къалмай, олар бир уллу уьлгю де дюр. Эртенги къуллукълагъа гиришгенче, 10 минутну ичинде бир башлап оьз гьайыгъызны этигиз. Чач тарагъыз, бетге багъыйлы къарав этигиз, арив опуракъ гийигиз, къаркъараны массаж яда «зарядка» булан сююндюрюгюз. Агьлюдеги халкъ булай исбайы, жагь ананы гёрюп, шогъар ошамагъа къаст этежек. Аслусу, къатынгиши оьз-оьзюнден кеп алажакъ. Тиштайпа учун буса, шо бек агьамиятлы.
- Уьйдегилер гьариси оьз орунун оьзлер жыйсын. Эртен уянып тургъандокъ шо тынч «ишни» кютсек, къалгъан гюн жыйнакълы болажакъ. Гьакъ кюйде, уллу ишлер орун жыйывдан башлана. Бу мердешни кютмеги булан оьзюбюзню низамдан чыкъма къоймай сакълайбыз. Бир иш багъыйлы кюйде этилген сонг, къалгъан загьмат да къыйышывлу болур.
- Гёз алгъа иш тутма уьйренейик. Бир-бир агьлюлерде эртенги айланыш ажайып гьалгъа чыгъа – яшланы акъырыгъы, уллуланы пелекети, къавгъа ва къувун. Улллуланы къычырыгъы яшланы бирден-бир низамсыз эте, олар ачувлу бола. Къарсалав буса, яшланы гьакъыл даражасына яман таъсир эте. Шолайлыкъны алдын алма болур, эгер этилмеге герекли ишлени гёз алгъа тутма болсакъ ва шогъар яшланы да уьйретсек. Яшлар заманын дурус харжламагъа уьйренсе, низам артажакъ, яшама енгил болажакъ. Гечеден итив урулгъан опуракъ, алданокъ онгарылгъан портфель гьалекликден сакълар, яшавну ёрукълу этер.
- Эртенни къыйын этмегиз, енгил этигиз. Бары да ишлеригизни гюнню башлапгъы вакътисине къоймагъыз. Эртен тургъанда, гечеден жувулмагъан савутну ва аш увакъгъа толгъан тепсини орнунда, ашуьйде тазалыкъ ва янгы къайнагъан чай къаршыласын. Эртенги ашгъа не бермекни гьакъында гечеден тутуп ойлашса яхшы. Заманны аямакъ учун йымышакъ биширмеге деп гече бары да тарыкъ-герекни онгармагъа яда локъумгъа хамур салмагъа ярар.
Эртен ва сав гюн талайлы болсун учун, аслусу, исси гьислени гёрсетме тартынмагъыз, чомарт болугъуз, бары да ювукъ адамларыгъызны сюегенигизни гёрсетигиз. Гьар эртен сюювню, абурлукъну, шюкюрлюкню гьакъында айтмакъны хасият этигиз. Инаныгъыз, шо бош сёзлер тюгюл, ожакъны сувукъдан ва пашманлыкъдан сакълар.
