Енгил этилеген татлилик
Енгил этилеген татлилик
Кёплер бу татлиликни гьакъында совет девюрлерден берли биледир. Печеньеден, какаодан ва къоздан этилеген шоколад ичек (колбаса) этмек учун печ де тарыкъ тюгюл. Шону уллулар да, гиччилер де бек сюе.
Тарыкълары: печенье – 400 грам, кама – 200 грам, какао-порошок – 40 грам (3 уллу къашыкъ), шекер – 150 грам, къоз – 100 грам, сют – 200 мл.
Гиччи къазангъа какао да, шекер де тёгебиз, арты булан сют къошула ва бир къалипли масса болгъанча булгъайбыз. Сонг къазанны печге салып, тюбюндеги отну аста этебиз ва булгъай туруп къайнагъанча къоябыз.
Бир минутну узагъында къайнагъан сонг, отну сёндюребиз ва къазанны ичине йымышатылгъан кама къошабыз ва шо иримей туруп яхшы кюйде булгъайбыз. Ондан сонг печеньени гьайын этебиз. Шону эки бёлюкге бёлебиз: кёп ва аз янына. Кёп янын уватабыз – шону учун блендер яда окълав къоллана. Аз янын буса, къолубуз булан гиччи-гиччи этип сындырабыз. Къозну да уватабыз – бичакъ яда окълав булан, арив ийиси чыкъсын учун уватгъанча тавада бираз къызартма да ярай. Сонг бир уллу бошгъапны ичинде бары да печеньени де, къозну да булгъайбыз. Шогъар шоколад къошулуп, янгыдан булгъайбыз. Натижада къоз-шоколадлы къалын масса болмагъа тарыкъ.
Столгъа эки къат этип пищевой плёнка яябыз (генглиги 40–50 сантиметр) ва шоколад массаны яртысын плёнканы ягъасына салып ичекге ошайгъан кюйде чырмайбыз. Хырларын чырмайбыз ва бюгебиз яда йип булан байлайбыз. Шо кюйде шоколадны къалгъанын да «ичекге» айландырабыз. Шо вакътиге эки де «ичек» таман чакъы сувугъан ва оланы уьч сагьатгъа холодильникге (яда бир сагьатгъа морозильникге) салабыз. Шолай этилип битгенде татлилик гьазир, ону бичакъ булан гесип чай ичмеге бек арив. Ашыгъыз татувулу болсун!
Юлия Зачёсова
