Жагьилликни алты уручусу
Бир-бир тиштайпаланы чагъын билип болмайсан: олагъа 25, 28, 30 яда 35 йыл боламы? Ойлаша туруп къаласан. Жагьиллигини сыры недир деп билме сюесен. Ёкъ, иш гиалурон уколларда, багьалы косметикада тюгюл, генетика булан да байланмагъан. Бары да затны башы – низам ва оьз уьстюнде ишлев.
Кёплерибиз яшнайгъан жагьиллигин ва чечекленген гёзеллигин гьар гюн татлиликлеге, къыйшайгъан аркъа сюегине ва юхудан тоймайгъанлыкъгъа алышдыра. Жагьиллигибизни не мердешлер урлай экен гьар гюн?
Татлини сюегенлер тез къарт бола
Билмеге нечакъы яман тийсе де, тек татлини кёп ашайгъанлыкъ артыкъ авурлукъгъа гелтирегенден къайры, гённю де тез къарт эте. Шекерли ашлар къаркъарада гликация болдурувгъа гелтире. Бу иш клеткаланы даражасында бузукъ гьал тувдура. Гликацияны натижасында гён жагьиллигин тас эте, шише, увакъ бюрюшмелерден тола.
Олтурувлу яшав
Эгер къаркъара ишлетивден не этип де баш къачыра бусакъ, сав ва йыртыллайгъан жагьил гён болажакъ деп умут этме тюшмей. Къаркъара ишлетив, физкультура метаболизмге болушлукъ эте, шо буса гённю янгырта. Натижада гён жагьил кюйде сакълана. Докторлар ташдырып айтагъан кюйде, къаркъараны ишлетив, спорт яда физкультура миокин деген белоклар тувмакъгъа кёмек эте. Шолар буса клетка оьсювге, коллаген ва эластин яралмакъгъа гелтире. Булар кёп болгъан сайын гённю даражасы да яхшы бола экен.
Юхудан тоймайгъанлыкъ
Юхудан тоймайгъанлыкъ – жагьилликни лап уллу душманларындан. Далиллер булан токъташдырылгъаны йимик, гьатта бир-нече гюн толу кюйде юхламай чыкъса да, гёнге таъсир эте. Кореяда шо гьакъда уллу ахтарывлар оьтгерилген болгъан. Къыркъ йылдан уллу тиштайпалар (бир гече 4 сагьат юхлап) жумада бир керен юхудан тоймай болгъанда шолайлыкъны яманлыгъы эки жумадан билине. Оланы бетинде тамгъалар чыгъа, гёню къургъакъ бола.
Къаркъараны тутагъан кюю (осанка)
Не затгъа буса да тюпге багъып нечакъы заман къарайбыз? Компьютерни алдында олтуруп яда телефонгъа багъып бу гьалда хыйлы заман къатып къалабыз. Натижада бойнубуз авурта ва гён тартыла. Бюкюрейгенлик (сутулость) бойнубузну ва сакъалтюпню мышцаларын бош эте. Къаркъараны тутагъан кюй (осанка) бузукъ буса, тёшге таъсир этип, гённю созуп эрши эте.
Ягъынывну таъсири
Бетге сюртеген кремлер, ягъынывну хыйлы-хыйлы тюрлю къайдалары, косметологланы кёмеги – гьалиги къызьяшлар учун гьар гюн къолланагъан гьамангъы иш. Амма булар барысы да химиядан нече де кёп толгъан. Шоланы гьатдан къоллав, бетге сюртюв гённю тез къартайта, буза ва эрши эте.
Терс гьалда юхлав
Косметологлар айтагъан кюйде, бетин бойлукъгъа къаплап, къурсагъына ятып юхламакъ гёнге таъсир этип, заманындан алда бюрюшмелер болдура. Гече ятып юхлайгъанда аркъасына яда хырындан ятып юхламакъ лап яхшы санала. Хырындан парахат юхлап болмакъ учун бойнуна ва бетине салагъан хас накладкаланы къоллама ярай. Олар «аривлюкню сакъламакъ» учун этилген. Шоланы кёмеги булан бойлукъ гёнге бек «басгъын» этмекден сакъланмагъа бола.
