Пайдалы ёравлар
Пайдалы ёравлар
- Ону-муну алмакъ учун тюкенлеге чыгъагъанда оьзюбюзге къыйышагъан, къаркъарагъа гёре опуракъ алмагъа бир-бирде болмай къалабыз. Шо саялы уьйде сантиметр лент булан оьзюбюзню оьлчейбиз ва санавлар къол тюпде болсун учун, шоланы телефонубузгъа язып сакълайбыз. Язмагъа герекбиз: тёшюбюзню уллулугъун, белибизни айланасын, базыкъ бутубузну (бедро) генглигин, бийиклигибизни, аякъны узунлугъун, къол бувунну базыкълыгъын, бармакъланы тарлыгъын ва шолай оьзге ерлени. Орта гьисапда йылда бир керен санавларыбызны янгыртабыз – алышынывлар бармы деп тергейбиз.
- Эгер бетге яда къоллагъа сюртеген крем битген буса – къутугъундан бир зат да чыкъмай буса – къайчы булан шону эки гесмеге ярай. Шонда уьч-дёрт гюнге чакъы ва артыкъ да шайлы крем къалмагъа бола.
- Эгер гечелер юхлама ятгъанда юху къачгъан буса, исси сютге бал къошуп ичмеге ярай. Шо къатты юхламагъа кёмек этежек.
- Эгер уьйде турагъанда бир еригиз гесилип, агъагъан къанны токътатмагъа герек буса, яраны уьстюне шекер яда шекер пудра сепмек ёрала. Шолайлыкъ бактериялагъа къаршы чара да дюр, неге десе олар кёп шекерге чыдамай.
