Татлилик багьалы болмакъ борч тюгюл
Ожакъ гьар тюрлю сурсатдан толгъан заманда эркин ва татувлу тепси къурмакъ къыйын масъала тюгюл. Амма имканлыкъ ёкъ заманда ва сюйген-сюйген сурсат алмагъа бажарылмай буса, аш биширивде, ожакъны рази этмекде айрыча пагьму тарыкъ болагъаны ачыкъ. Аз зат булан, къолда бар ашамлыкъланы къоллап, татувлу ашлар нечик гьазирлемеге болагъанны ачыкъ этмеге къарайыкъ.
Трайфл
Бу тамаша аты булангъы татлилик кёбюсю кондитерскийлерде сатылып бар. Гиччирек стаканны ичиндеги сувлу бу десертни гёргендокъ силегейлер агъызып йибере. Ону багьасы аз тюгюл, тек шону уьйде этмеге бола экен.
Гьазирлемек учун тарыкълы зат: гьамангъы печенье – 140 грам, 100 грам ичмеге деп гьазирленген кофе, 350 грам къаймакъ, эки банан, шекер пудра, бираз мураба. Трайфл этмек бек тынч ва ашамагъа нече де татли.
Печеньени блендер булан яда оьзге кюйде увата. Бананланы туврай, кофени бишире. Къаймакъны шекер пудра булан булгъай. Десертни онгара – шиша стаканны тюбюне печенье яйыла, эки къашыкъ кофени уьстюне себе, сонг банан салына. Арты булан мураба къошула ва бирдагъы печенье. Ахырда крем салына ва печенье себелене. Стаканны уьстюн ябып, эки сагьатгъа холодильникге йибере. Муна шулай тынч затлардан алай арив десерт бола. Шону гьатта гиччи яш да этмеге бола.
Шоколатдан этилген мусс
Ишден арып гелгенде, авзунгда ирийген шоколатдан этилген мусс ашасанг, шоссагьат гёнгюнг гётерилер. Шону этмек учун тарыкълы зат: къара шоколат – 100 грам, кама – 30 грам, шекер – 50 грам, уьч йымырткъа.
Шоколатны уватабыз, кама ва шекер къошуп, пар булан иситебиз. Йымырткъаны сарисин агъындан айырабыз. Сарисин шоколатгъа къошуп, яхшы кюйде булгъайбыз. Йымырткъаны агъын буса, блендер булан яхшы кюйде аталайбыз. Астаракъ булан, къашыкъ-къашыкъ этип акъны шоколатгъа къошабыз. Муссну формалагъа ерлешдирип, 5 сагьатгъа холодильникге салабыз. Муна сизге бирдагъы алай арив десерт!
