Татли затлардан айрылайыкъ
Татли затлардан айрылайыкъ
Яйны вакътисинде адамлар ял ала, артыкъ затдан айрылмагъа сюймей, шону ичинде артыкъ авурлукъдан да. Шекер ва углеводлар инче белни лап уллу душманлары экенни барыбыз да яхшы билебиз. Къаркъарабызны авурлугъун аз этмеге башлагъанда муна шулардан къутулмагъа бек къыйын бола. Татлиликлени ва хамурдан этилген ашланы даим ашамай турмагъа бажарыламы? Алай арив бажарыла, аслусу – шолайлыкъны гертиден де этмеге сюйсе ва бир-нече ёравланы кютсе бола.
1. Аслу аш ашав толу болмагъа герек. Эртенги, тюшдеги ва ахшамгъы толу кюйдеги аш ашав татлиликлерден къутулмагъа кёмек этмеге бола. Озокъда, булайлыкъ артыкъ ашамагъа тарыкъ демек тюгюл. Ашыгъыз татувлу ва енгил болсун, яшылчалар ва овошлар кёп къоллагъыз. Пайдалы майланы гьакъында да унутмагъыз – эртенлер рафинированный тюгюл урлукъ май, къаймакъ, сари май ашаса, кёп замангъа ач къоймай сакълай.
2. Татлиликлени орнунда емишлер ашагъыз. Татуву татли бары да затны гери урмагъа тарыкъ тюгюл. Емишлер татлиликлени орнун алай арив тутмагъа бола. Бир-нече гюнню узагъында татли зат ашамасагъыз емишлени татуву айрыча татувлу тиежек. Шолайлыкъ булан, бара-бара шекерли ашланы орнун емиш тутса, къаркъарагъа да пайда болур, татли зат етишмей деп къыйналма да тюшмежек.
3. Калорийни аз этмей сакълама да бажарыла. Шекери бар ашамлыкъланы къойгъанда оьзге ашланы да шоссагьат гери урмагъа тарыкъ тюгюл. Шолай этсегиз, шекерли ашланы къоювугъуз тынч оьтежек ва гьатта психикагъа да гюч болмас. Натижада буса, бир жумалардан азмагъа башлажакъсыз ва артыкъ килолар таяжакъ.
4. Леззет алывну ёлларын излегиз. Бермеге сюеген ёравум адам билмесдей иш тюгюл, тек кимни де хошун гётермеге бола. Гезев, спорт, сурат этив, гюлебете тигив (вышивание), китап охув, къатнав – яшавну толумлашдыра, ярыкъ эте. Шолайлыкъны сайласакъ, телевизорну алдында татлиликлер булан хырындан янтайып чай ичгенден эсе шайлы да къолайдыр.
Оьрде берилген ёравлагъа гёре этмеге болсакъ, узакъ къалмай натижаны да гёрербиз. Шекерден къутулмагъа къыйын иш ва натижалар гёрюлмеге башлагъанда ругь гётерилмей болмас. Бир айдан юхугъуз къатты болажакъ, гёнгюгюз ачылажакъ, къурсакъдагъы авурлукъ таяжакъ, бетигиз ачылажакъ ва бир-нече килогъа енгил болажакъсыз.
