Уьйде этилген марожна
Уьйде этилген марожна
Яйны исси гюнлери битген буса да, кёплерибиз бек сюеген марожна ашавну сувукъ заманда да къоймай. Шолар учун бу татлиликни уьйде этеген бир-бир кюйлерин язмагъа сюйдюк, негьакъ болмасгъа да инанабыз.
Агъач жиелек (малина) марожна
Ажайып гёрюнюшю, тамаша татуву ва этмеге тынч кюю – бу рецептни яхшылыкъларындан. Шону этмек учун бир кило агъач жиелек (йылны бу вакътисинде ону тапмагъа къыйын тюгюл), бир стакан шекер, лимон сокну эки уллу къашыгъы ва бир стакан натуральный йогурт тарыкъ болажакъ. Бу татлилик пайдалы да болгъанны сюе бусагъыз, шекерни орнунда шону орнун тутагъан башгъа татли зат къошмагъа ярар. Агъач жиелекни лимон сок булан блендерни ичинде аталайбыз. Болгъан къалын пюрени бюртюклеринден сюзюп тайдырабыз. Сонг шогъар йогурт къошула. Болажакъ татлиликни хас сабагъа чыгъартып холодильникге йиберебиз. Яхшы кюйде къатгъанча гьар 20–30 минут марожнаны булгъамагъа тарыкъ.
Лимон-къаймакълы татлилик
Кимни де хошуна гелер йимик бу бек тизив марожна. Шону этмек учун 8 лимон, 450 мл сув, 300 грам шекер пудра, 500 мл къаймакъ (сливки) тарыкъ болажакъ.
Лимонну сыгъып согун чыгъарта, къабугъун къыравучдан (тёрка) чыгъарта. Шогъар шекер пудра ва сув къошуп, булгъай туруп, 20 минут къайната. Къаймакъны аталай. Къайнатылагъаны сувугъан сонг шогъар аста булгъай туруп къаймакъ къошула. Сонг шону хас савутлагъа тёгюп, холодильникге сала. Къатгъанча гьар сагьат булгъамагъа да тарыкъ.
Къаймакъсыз марожна
Майлы пломбир сюймей бусагъыз, булай этилген марожнаны ушатарсыз. Ону этмек учун 2,5 стакан сют, бир стакан шекер, йымырткъаны 4 сариси тарыкъ болажакъ. Сютню башлап къайната, сонг 50 градус болгъанча сувута. Йымырткъа сарилени шекер булан къатты болгъанча аталай. Сонг шону йылы сютге астаракъ булан къоша. Арты булан бу къошулчаны аста отда къалын болгъанча бишире. Биширегенде ону булгъай турмагъа тарыкъ. Биширген сонг сувумагъа къоя.
Сувугъан сонг смесни савутгъа чыгъартып эки-уьч сагьатгъа морозильникге сала. Марожна бузгъа айланмасын учун гьар ярым сагьат ону булгъай турмагъа тарыкъ. Муну емишлер яда шоколад булан ашамагъа да ярай.
