Сююв беклешдиреген сёзлер
Сююв беклешдиреген сёзлер
Гьар агьлюню яшавунда гётерилив ва эниш тюшюв боладыр. Эр-къатынны арасы бал йимик татувлу болагъанда сююнесен, тек бир-бирде агьлюдеги сююв сёнеген гезиклер де бола.
Агьлю аралыкълар алышынмагъа болагъанны билмек агьамиятлы. Гьислер – жаны бардай оьсе, алышына, бизин булан даражасы арта. Жагьиллеге хас юрек яллатагъан гьашыкълыкъны орнунда, сонг бир-биревге бакъгъан гьюрмет геле, экевню аралыгъы бек байлана, терен инамлыкъ оьсе. Бирче нечакъы узакъ яшаса да, аралыкъланы татувлу кюйде сакъламагъа бажарыла экен. Эр-къатын бир-бирине исси, йымышакъ, сююв сёзлер айтса, агьлюдеги гелишлик, сыкълыкъ сёнмей сакъланажакъ. Шо гьакъда пайдалы бир-нече ёрав берйик.
- «Я, не арив этип бажарасан!».
Психологлар гьисап этеген кюйде, эр-къатынны аралыгъы къатты болмакъ учун, олар бир-бирисини яхшы янларын белгилемек ва шо гьакъда айтмакъ агьамиятлы. Сюеген адамына, ону яхшы хасиятларын эсине салмакъ булан, ону оьз къыйматлыгъын да артдырарсыз, аралыкъларыгъызны да бирден-бир байларсыз. Гьашыкъ экенигизни ачыкъ этегенде, гьислеригизни билдиреген булан, сиз огъар «бары да затны дурус этесен!» деген бола. Шолайлыкъ булан ону тарыкълыгъын гёрсетисиз.
- «Уллу насип сени булан яшамакъ».
Яшавубузну аслу яны загьмат, о-бу тарыкъны артындан чабыв, гьар-тюрлю иш этивден толгъан. Шо чабывулда яндавурубуздагъылагъа баракалла сёзлер айтмагъа унутуп къалабыз. Яшав къыйынлыкъланы башдан оьтгермеге кёмек этегенлени гёнгюн алмайбыз. Шону орнунда яшав ёлдашыбызгъа да (оьзюбюзге де) ол бизин учун аявлу ва агьамиятлы экенин бола туруп кёп айтмагъа тарыкъ. Насип шу адамыбыз булан байлавлу экенни огъар етишдирмеге герек.
- «Сени янынгда парахат ва къоркъунчсуз гьалдаман».
Олжагъызгъа ону янында парахатлыкъны сезегенигизни гьакъында айтыгъыз. Шолай сёзлер чалынса, арадагъы инамлыкъ артажакъ. Агьлюде айрыча ерде экенин билмек эргиши учун бек агьамиятлы. Огъар шо гьакъда заманда бир етишдире турса, ол дагъыдан-дагъы жаваплы ва агьлюню гьайын белсенип гьайын этеген болажакъ.
- «Мен сагъа бек гьюрмет этемен ва пикрунгну абурлайман».
«Гьюрмет ёкъ ерде сююв болмас» – бу бырын айтыв нечакъы айтылса да, ялгъан болмас ва татувлу аралыкъланы кюрчюсю санала. Озокъда, олжагъа яхшы янашыв сёз булан битип къалмай, инг башлап яхшы ишлер булан белгиленмеге герек. Амма яшав ёлдашыгъыз нечик тарыкълы ва сизин учун агьамиятлы экенин айта турмакъ артыкъ болмас. Эр-къатын бир-бирини яшавунда айрыча ер тутагъанны англайгъаны, олагъа хыйлы яшав масъалалардан оьтмеге кёмек эте.
- «Бары да къыйынлыкълардан бирче чыгъарбыз».
Яшав ёлубузда не къыйынлыкълагъа къаршы болажагъыбызны билмейбиз. Шо саялы яндавурубузда герти кюйде инанмагъа ярайгъан адам бар болмакъ бек агьамиятлы. Эр-къатын бир-бири учун шолай таяв болмакълыкъ уллу насип. «Биз бирчебиз», «Мен сени янынгдаман», «Даим сени буланман». Гьар къыйынлы гьалда булай сёзлени эшитмеге ким де сюедир.
