«Аяп тутагъан къатын» деген торт
Багьа олтурмайгъан татли ашланы этеген кююн язып узатайыкъ. Бугюн «Наполеон» деген тортну учуз къайдасын таклиф этебиз. Ону аты «Аяп тутагъан къатын» («Экономная жена»).
Тарыкълары: маргарин (хамур учун) – 200 грам, сув (хамур учун) – 1 стакан, будай ун (хамур учун + 2 уллу къашыкъ крем учун) – 3 стакан, шекер (крем учун) – 2 стакан, йымырткъаны сариси (крем учун) – 3, кама (крем учун) – 100 грам, сют (крем учун) – 3,5 стакан, туз – бир къысым (щепотка), ваниль (крем учун), безендирмек учун къалын къаймакъ (сливки), шоколад (безендирмек учун), кондитер себелевлер (безендирмек учун), емишлер ва къоз (безендирмек учун).
Этеген кюю: байрам башлангъанча эки-уьч гюн алда этме башласа яхшы.
Хамурну ахшам этсе яхшы. Йымышатылгъан маргаринни алып, гиччи этип гесебиз, сув къошабыз. Шогъар ун къошула, булгъана ва туз да сала. Хамур къолгъа ябушагъан ва йымышакъ болмагъа тарыкъ. Уьстюне плёнка ябып гечеге холодильникге салабыз.
Эртен крем биширме башлайбыз. Йымырткъа сарилени шекер булан булгъайбыз. Шогъар алданокъ йымышатылгъан кама къошула. Сонг шогъар сют тёгюле ва алгъасамай булгъай. Ун къошулуп яхшы кюйде булгъамагъа тарыкъ, тююрлер къалмагъа герекмей. Сонг ваниль къошабыз. Кремни отну уюстюне салып, булгъап, къайнайгъан гьалгъа гелтиребиз.
Холодильникден хамурну алып, шону он гесекге бёлебиз.
Бирисин дёгерек этип, къалгъанларын холодильникге къайтарабыз. Йымышакълар йимик юкъкъа этип яябыз – юкъкъа болгъан сайын яхшы. Бошгъапны яда къапгъачны кёмеги булан ягъаларын гесип тегишлейбиз. Хамургъа астаракъ булан тиш тюртебиз – ягъаларында кёп, ортасында буса, аз тюртебиз. Сонг шоланы биширебиз.
Бирисинден къайры (ону уватма къоябыз), гьар биширилген гесекге яхшы кюйде крем сюртебиз. Сонг оланы къат-къат этебиз, крем яхшы сингмек учун уьстюне авур зат (масала, бошгъап) салабыз.
Чыдамлыкъ къалса, крем бирден-бир сингме болагъан кюйде тортну бир гюнге къоябыз.
Экинчи гюн шо бир къатны уватабыз. Къаймакъны аталайбыз. Тортну ягъаларына крем сюртебиз, уьстюне уватылгъан гесеклер себелейбиз ва безенчиклер булан арив этебиз.
Берекетли болсун ашыгъыз!
