Чай, кофе: сувукъ заманда айрокъда тарыкълы
Къыш вакъти – ажайып заман, айрокъда исси уьйде де олтуруп, къаркъараны исиндиреген чай яда кофе ичип йибере бусанг. Тёбенде оьзюбюз ярашдырма болагъан шолай арив чайланы ва шоколадны этеген кюйлени беребиз: ювукъ адамларыгъыз тийишли къыймат бермей къоймас.
Жанжепил ва дарчин булангъы татывлу чай
Тарыкълылары: 1–2 гиччи къашыкъ булан чай; 1–2 гесек жанжепил (имбирь); 1 гиччи таякъ дарчин (корица); бал, шекер; ярым литр сув.
Сувну къайнатыгъыз. Къайнап турагъан сувгъа жанжепил гесеклер ва дарчин таякъ ташлагъыз. Отну аста этигиз ва 5–7 минут тонгмагъа къоюгъуз. Арты булан чай къошуп, дагъы да бир-эки минутгъа къоюгъуз. Сюзюп, бал яда шекер къошугъуз.
Къайнар шоколад
Тарыкълылары: 2–3 гиччи къашукъ булан какао порошок; 200 миллилитр сют; бираз дарчин; бираз жанжепил (уватып, порошок къайдадагъы); бал, шекер.
Гиччи къазанда сютню иситигиз. Сонг какао порошок, дарчин ва жанжепил къошугъуз. Булгъай туруп, къайнайгъан гьалгъа гелтиригиз, тек къайнатмагъыз. Отну сёндюрюп, бал яда шекер къошугъуз. Бираз тонгмагъа къоюп, хабалагъа тёкме ярай.
Бал ва жанжепил булангъы облепихалы морс
Тарыкълылары: 200 грам облепиха; 1 литр сув; 3–4 уллу къашыкъ булан бал; 1–2 гиччи къашыкъ булан жанжепил (гесилген яда къыравуч булан уватылгъан).
Облепиханы жувуп гьазирлегиз. Сувну къайнатыгъыз. Къайнайгъан сувгъа облепиха, жанжепил ва бал къошугъуз. Булгъап, отну аста этигиз. 5–10 минутгъа тонгмагъа къоюгъуз. Сюзюп онгаргъанда морс ичмеге гьазир.
