Къоркъунчсуз оюнчакъ нечик сайлайыкъ
Гьар ата-ана баласыны айланасы къоркъунчсуз болсун учун гьаракат эте. Амма бир-бирде къоркъунчлукъ атаны алатларында яда ананы савут-сабасында тюгюл, яшны къолунда болуп къала.
Яшлагъа алынгъан оюнчакъларда да къоркъунчлукъ бола экен. Уллулар оюнчакъ сатып алагъанда бир-бир шартланы билмеге герек. Шо не затдан этилгенге инг башлап агьамият бермеге тюше. Пластик къатты ва сан яны тетиксиз болмагъа тарыкъ. Юкъкъа буса, сынып, итти мююшлери булан яшны сыдырмагъа болур. Олай да, пластикден яман ийис гелмеге тюшмей. Эгер оюнчакъ къумачдан, агъачдан яда оьзге башгъа затдан этилген буса, шо ёравлар нечик де сакъланмагъа тарыкъ.
Сонг да, оюнчакъ нечик ясалгъан кюйге агьамият бермеге тарыкъ. Ону ялгъангъан кююн, тиркилген ерлерин ахтарып къарамагъа тюше. Эгер шолар герек кюйде этилмеген, осал жыйылгъан буса, шо да къоркъунчлу. Малны сертификатын сорамагъа уялмагъыз. Оюнчакъны къутугъу да кёп затны англатмагъа бола. Шо айтардай тизив этилмеген буса, ичиндегиси де осал болмакъ бар.
Оюнчакъ къайсы чагъындагъы яшлар учун этилгенге де агьамият беригиз. Янгы тувгъан нарыстагъа 3 деп язылгъан оюнчакъны алмагъа маънасы болмас. Неге десе ону ичиндеги увакъ гесеклер яшны савлугъуна зарал гелтирмеге болур. Ондан къайры, гиччипав шо оюнчакъдан леззет алып ойнамагъа да болмас. Шолай гезиклерде яш тез арыса, оюнчакъдан гёнгю чыкъса, тамаша болмагъа тюшмей. Балики, чагъына гёре тюгюлдюр къолундагъы зат.
Гезикли оюнчакъ алагъанда, яшыгъызгъа осал санлы «къакъай» гертиден де тарыкъмы экен деп, бир башлап ойлашып къарагъыз. Авзун япмакъ учун къаршы гелген учуз нени де алып къоймагъыз. Шолай этгенче, гьалны суратлап, имканлыкъ болгъан сонг аривюсюн аларбыз деп яшгъа англатсагъыз яхшы болур.
