Къабакъдан этилген йымышакълар
Къабакъдан этилген йымышакълар
Къабакъ – бек пайдалы ашамлыкъ: ону бар кююнде де, биширип де, къурутуп да, пар булан иситип де ашама ярай.
Къабакъ айрокъда тиштайпаны савлугъу учун пайдалы: гёзлеге яхшы, жагьилликни сакълай, рак аврувну алдын ала, къатынгиши аврувлагъа дарман, къан ишлевге кёмек эте, къаркъара авурлукъну аз этмекге болушлукъ эте, юрек ва къан тамурлар учун яхшы, бюйреклени, аш къазанны ишлевюне пайдалы, гён ва ш.б. санлар учун таъсирли. Этмеге тынч ва татувлу къабакъ йымышакъланы таклиф этебиз бугюн.
Тарыкълылары: къабукъдан арчылгъан къабакъ – 400 грам, кефир – 150 грам, йымырткъа – 2, ун – 160 грам, кама – 10 грам, шекер (сюе буса) – 150 грам, кунжут сюйген кюйде къошула.
Урлугъундан тазалангъан къабакъны дёрткюл этип гесебиз ва парны уьстюнде 40 яда 50 минут биширебиз, мультиварканы къоллама да ярай. Къайнап турагъан сувну уьстюндеги челтирни ичинде биширме де бола. Сонг ймырткъаны сындырып, бир хабаны ичинде кефир булан булгъайбыз. Шону ичине ун элеп, барын да булгъайбыз. Къабакъны блендер яда башгъа кюйде уватып, сонг шо баягъы хабагъа къошабыз ва татли болгъанны сюегенлер бираз шекер къошмагъа бола (тек шекерсиз де этмеге ярай). Артда да кунжут къошула ва янгыдан булгъана
Тавагъа кама сюртебиз ва уллу къашыкъ булан болгъан «хамурну» ону устюне яябыз. 180 градуслукъ печни ичинде йымышакъланы 15 минут биширебиз.
Йымышакъланы къаймакъ яда бал булан ашамакъ яхшы. Татувлу болсун ашыгъыз!
