Эр булан ярашмагъа кёмек этеген пайдалы ёравлар

Эришив – агьлю яшавда болагъан иш. Эр-къатынны аралыгъы нечакъы къыйышывлу буса да, оланы ожагъында, гелишли ва ачыкъ чакъ булан аралап, явунлар ва кёк кёкюревлер болмай къалмай. Гьалиги яшавда «интернет» ажайып кёмекчи болгъан ва хыйлы тиштайпалар ондан таба эри булан ярашмагъа ва аралыкъларын ёрукълу этмеге къарайгъаны кёп болуп бара. Нечик тюз ярашагъангъа энни уьйренмеге къарайыкъ.

1. Бир-биригизге ойлашма заман къоюгъуз

Эришип битип, сонг шоссагьат гелишли къатнав юрютмеге кёплер гьазир тюгюл. Шо саялы «сувумакъ» учун бираз заман гетмеге къоюгъуз. Ойларыгъыз ва гьалыгъыз гьамангъы кюйге гелмек учун оьз вакътиси гетмеге тарыкъ. Хатири къалып эшикни къагъып айланмагъа, ачувну гёрсетмеге бирт де ярамай. Шолай этмек, гьалны оьрчюкдюрсе тюгюл, пайда гелтирмес. Шону орнунда, къызышыв басылгъан сонг, масъаланы айланасында сёз юрютмеге ёл къоюлгъанны олжагъызгъа белги этигиз.

2. Гечмеге болугъуз

Хаталагъа мюкюр болмакъ ва гечмекни тилемек – инсанны даражасы оьсгенлигин гёрсете. Эгер эришив къатынны айыбындан болуп, ол шогъар гьёкюнюп, гечмекни тилеген булан, эри шоссагьат огъар иржайып, ачыкъ юзлю болажакъ деп ойлашмагъа тюшмей. Бир вакъти эришивню гьызы билинип туражакъ. Шо заманны ичинде къатын оьзюн илиякълы тутса яхшы, эри иссилик гёрсетежек деп умут этмей. Узакъ къалмай бары да зат ерли-ерине гележек деп ойлашмакъ яхшы болур. Аслусу – гележекде янгы эришивлерден сакъланмагъа къаст этигиз.

3. Ачыкъ лакъыргъа гьазирленигиз

Психологлар айтагъан кюйде, эришивден сонг узакъ заман бир-бири булан сёйлемей ва гёрмемиш турмакъ яман натижалагъа гелтире, эр-къатынны арасындагъы гьислени сувута. Эришивню къызгъын вакътиси битген сонг, къатнавну башламагъа тарыкъ. Арада айтылмай къалгъан сёзлер бар заманда, хатиржанлыкъ оьсюп тербей ва шолайлыкъ янгы айыплавлагъа ва эришивлюклеге гелтирмеге бола. Эришив нечакъы теренге гетсе де, эргишини менлигине тиймекден сакъ болугъуз. Сонг да, оьз гьалыгъызны англатмагъа къарагъыз ва гележекде эришмей нечик турмагъа болагъанны бирче ойлашыгъыз.

4. Эришивлени себебин табыгъыз

Эр-къатын бир-бири булан ярашсын учун, эришивлюклер не саялы болагъанны себебин билмеге тарыкъ. Эри къатынына увакъ-тюек затлар саялы «илинегенни» себеби ишиндеги масъалалар, ону имбашларындагъы авур жаваплыкъ болмагъа бола. Къатын гьар затдан парахат ва эрине сувукъ янашагъанны себеби буса, ол гьар гюнлюк уьй къллукълардан арыгъанлыкъ болмагъа ярай. Эришивлер не саялы болагъынны англамакъ учун, къатын оьзюне багъып эрини гёзлери булан къараса яхшы. Гьалыгъызны ахтарып къарагъыз ва ол айтагъаны тюзмю яда гьатдан озамы деп, яшырмай оьзюгюзге мюкюр болугъуз.

5. Эришивлер башгъа-башгъа бола

Ожакъда болагъан эришивлюклерибизни аслу гьалда эки тюрлю гюпге бёлмеге бола. Биринчи гюп – гележекге байлавлу умутлар, яшланы тарбиялаву, къардашлар аралыкълар булангъы агьамиятлы масъалалар. Экинчиси – гьар гюнлюк ишлердеги увакъ себеплер. Биринчи масъалада ойлашып, хотгъап къарап, эр-къатын не саялы эришегенни себебин аян этмеге ва сонг шону басылтмагъа айтардай къыйын иш болмасдыр. Амма экинчи гюпдеги масъалаланы олай рагьат кюйде ёкъ этмес. «Неге сют алмадынг?» яда «Къайда мени алатларым?» – деген ёрукъдагъы оьпкелевлеге асаслангъан эришивлюклер агьлю яшавда кёп бола. Эргишилерден эсе къатынгишилени гьакъылы бираз итти ва гьиллалы санала, шо саялы биз булай заманларда ёл къойсакъ, «алдатма» уьйренсек яхшы болур.

6. Болгъан ишни эсден тайдыр...

Кёбюсю къатынлар алда болгъан ишлени, хатири къалгъанланы эсде сакълай ва сонг эрлерине оьпкелей. Амма ожакъда парахат яшавлукъ, гелишлик болгъанны сюе бусакъ, шолай этмеге тюшмей. Эришив – болду, битди, ярашувлукъ этилди: шону булан тамамланмагъа тарыкъ. Тюнегюн болгъаны унутулду, гележек яшавгъа гёз къарала, онда буса, бир-бирин англав, парахатлыкъ оьмюр сюре.

Халкъ арада «Эришвсюз сююв, тузсуз шорпа йимик» деп айтыв бар ва шо сизге къыйышамы-къыйышмаймы оьзюгюз билигиз. Амма шо «туз» булан сакъ болма герек, неге десе тузланмагъан ашгъа туз къошмакъ тынч, бек тузланса, татувлу этгенден эсе.

Эр булан ярашмагъа кёмек этеген пайдалы ёравлар