Гюнчюлюкден къутулмакъ учун 5 ёрав
Бугюн гьашыкъланы арасында болагъан бу яман хасиятны гьакында айтмагъа сюебиз. Гюнчюлюк (ревность) – юрекде тувагъан учгъун ва оьсе туруп уллу от тюшювге айланып, бир-бирин сюегенлени арасында ялын салмагъа болагъан яманлыкъ. Бирче яшайгъанланы арасына бу пелекет тюшсе, оланы яшаву аччы бола, бузула.
Гиччиде болгъан хатар, оьзюн осал гёрюв, яшавда болгъан къыйынлыкъ ва шолай бир-бир себеплер – менлигибизге таъсир этип, агьлю яшавубузну тозмагъа бола. Ондан къайры, аралыкъ бузулагъаны аз йимик, булай гючлю гьислер психика аврувлар тарытып, адамны савлугъун да похлай.
Генг яйылгъан шу яманлыкъны алдын нечик алмагъа болагъанны гьакъында ва гюнчюлюкню отун басылтмагъа болагъан ёравлар бермеге энни тийишли гёрдюк.
1. Тюз тюшюнюв
Ерсиз ва бузув гелтиреген гюнчюлюк къоркъувдан башлана. Биз сагьатлар, гюнлер, айлар булан не болуп къалар экен деп ойгъа батабыз, оьзюбюзге яманлыкъ тартабыз. Гюнчюлю къатынлар яман ойлары булан оьзлеге авур эте, шо къоркъунчларын яшавгъа чыгъарта йимик бола. Олар эрин гьызарлай, къатты сорав-алывгъа тута, оьзюн айыплы гёрердей олжасына басгъын эте. Шолай къатынлар эри башгъа тиштайпагъа гетгендей гёз алдына гелтире, янгыз къалажакъдан ажайып къоркъа ва натижада ойлары яшавгъа чыгъып къалмакъ да бар.
2. Девню гиччиде оьлтюр
Гюнчлюк юрекни къуршап, тыныш алмагъа болмайгъан даражагъа бата тура бусагъыз, сакълыкъ лап яхшы дарман. Бир затгъа да агьамият бермей къоюгъуз. Гьислер нечакъы оьрчюп бара буса да, гьакъылдан тайышмагъа тюшмей, акъны къарадан айырмагъа болабыз чы. Яман ойлар, ичибиздеги девлер уянмагъа башласа, шоссагьат шоланы басылтмакъны гайын этмеге тарыкъ.
3. Оьзюнгню сюй
Бары да психологлар бир тавушдан айтагъан кюйде, гюнчюлюк – оьз-оьзюне инанмайгъанлыкъдан бола. Кёбюсю гезикде оьз-оьзюне таянмайгъанлар гюнчюлюкге бата, мунда гьашыгъын тас этив булан аралыкъ ёкъ. Шолай адамлагъа даим оьзюне агьамият берилегенлик тарыкъ, огъар оьзюне бакъгъан исси гьислер етишмей. Ону эсине гелеген кюйде, яшав ёлдашына огъар йимик артыкъ агьамият тарыкъ. Эригизни телефонун хотгъагъанча, башыгъызгъа къайдагъы ойлар гелтиргенче, оьз гьайыгъызны этсегиз яхшы болмасмы дагъы?
4. Не етишмейгенни гьакъында ойлаш
Бир-бирде гюнчюлюк ёкъ ерден тувмай, аралыкълардагъы сувукълукъ шогъар себеп болмагъа бола. Бир-биревге агьамият берив, илиякълыкъ, ушаныв, аявлав – шолар тиштайпагъа етишмей буса, ол асил жандан ачувлу къатынгъа айланмагъа бола. Аслу гьалда эргишилер булай инче гьислени англамай къала, шо саялы къатыны огъар аралыкъларда болмагъа яхшы ишлени уялмай, тартынмай, оьзю нени ушатагъанны ачыкъ этсе пайдалы болур.
5. Гюнчюлюкню орнунда баракалла билдирив
Гюнчюлюк гьатдан озмаса, нормагъа къыйыша. Агьлю аралыкълагъа пуршав этмей буса, шонда яманлыкъ ёкъдур. Ойлашып къараса, эргишини айланасында хыйлы къатынгиши бар ва шоланы къайсы да сизин еригизни тутмагъа бола. Амма эригиз оланы тюгюл, сизин сайлагъан ва сизин булан яшай. Шо саялы гюнчюлюк гьислени орнунда, бар-барлыгъыгъызгъа сююнюп, шюкюрлюк билдирсегиз яхшы. Баракалла билдирив – ажайып иш, шону кёмеги булан аралыкъланы беклешдирмеге бажарыла, ич яшавну да тетиксиз этип, юрекге парахатлыкъ гелтире.
