Анам, Ислам динни гьакъында айт магъа!
Анам, Ислам динни гьакъында айт магъа!
(Давамы. Башы алдагъы номерде)
– Ана, шончакъы кёп болгъан экен пайхаммарлар! – деп яшлар тамаша бола.
– Болгъан, болгъан, – деп ана иржая ва хабарын узата.
– Олай да, биз Сорав алынагъан гюн болажакъгъа инанабыз. Оьлген адамланы барысын да Аллагь ﷻ тирилтежек. Биз Сорав алынагъан гюнге гьазирленебиз, неге десе Аллагьгъа ﷻ инанабыз. Сорав алынагъан гюн гьар ким этген ишине гёре тийишлисин алажакъ: яхшылыкъ этгенлер – женнетге гирежек, Аллагьгъа ﷻ тынгламай, яманлыкъ этгенлер буса – жагьаннемеге тюшежек. Шолайлыкъ булан, балаларым, биз женнет ва жагьаннем баргъа да инанабыз. Женнет – лап да арив ер, жагьаннем буса – лап да яман ва къоркъунчлу ер, Аллагь ﷻ сакъласын шондан! Бусурманлар къадаргъа да инана. Къадар демек – бары да зат, яман да, яхшы да, адам этеген ва гьайван этеген янгыз бир Аллагьны ﷻ пурманы булан бола. Башгъача айтгъанда, бары да зат Есибиз Аллагь ﷻ буюрса тюгюл болмай. Иманы бар адамлар инанагъан кюйде, Яратгъаныбыз Аллагь ﷻ бизге пайхаммарланы яхшылыкъны яманлыкъдан айырмагъа уьйретсин деп йиберген. Шо саялы гьар яш да, уллу да оьз ушатгъанын сайламагъа бола: яхшылыкъ этип Аллагьны ﷻ разилигин къазанмагъа яда яманлыкъ этип жагьаннемге тюшмеге.
– Ана, сенден эшитип турагъаныкъ бек къужурлу! Дагъы да билмеге сюебиз! – деп Муслим ва Асият анасына хабарын узатмагъа тилей.
– Балаларым, сизге Игьсанны гьакъында да айтайым, – деп ана сёзюн узата. – Игьсан деп таза ва гьакъ юрекликге айта. Шо гьакъда бизин аявлу Мугьаммат Пайхаммарыбызгъа ﷺ сорагъанда, ол булай англатгъан: «Игьсан – Есибиз Аллагьгъа ﷻ Ону гёрегенде йимик ибадат этмек. Сен Ону гёрмесенг де, Ол сени даим гёре». Яшлар пысып яхшы кюйде тынглай.
– Гьакъыл тёбелерим, Аллагь ﷻ гьар заманда да бизин гёре! – деп ана артын узата. – Ер юзюню не еринде болсагъыз да, Аллагьдан ﷻ яшынмагъа бажарылмас, шо саялы бир заманда да яманлыкъ этмегиз. Яманлыкъ этип къойсагъыз буса, Аллагьдан ﷻ тезтез гечмекни тилегиз. Есибиз Аллагь ﷻ Оьзюнден тилейгенлени сюе ва этген ишине гьёкюнегенлени гече.
– Анам, мен гьар заман Аллагьны ﷻ эсимде сакълажакъман ва Ол рази болсун учун сагъа тынглажакъман ва яман ишлер этмежекмен, – деп Муслим сёз бере. – Мен де! – деп Асият къошула ва анасыны къолун тута. Муслим ва Асият школадан къайта, анасы олагъа татли аш биширген ва ашамагъа чакъыра. Яшлар экиси де къолларын жувуп: «Бисмиллягьи-р-рагьманир-рагьим» деп айтып ашамагъа башлай. Ашап битгенде буса: «Альгьамдулиллагь», – дей. – Аявлу ана, Мугьаммат Пайхаммарыбызны ﷺ гьакъында дагъы да айт дагъы бизге, кёп затны билмеге сюебиз, – деп яшлар анасына тилей. – Озокъда, айтарман, балаларым, – деп ана Расулуллагьны ﷻ яшавун суратлай. – Дюньяда яшагъанланы арасында лап яхшы адамны гьакъында билеген бары да затны айтарман.
Пайхаммарны аты – Мугьаммат, атасыны аты Абдулла, анасы буса – Аминат. Аллагьны Элчиси ﷺ сыйлы Кааба бар Маккада раби уль-аввал айны 12-нде, итнигюн тувгъан. Шо 571-нчи йыл бола. Мугьаммат ﷺ етим болуп тува, неге десе атасы Абдулла ол тувгъанча оьле. Амма анасы булан да Мугьаммат ﷺ узакъ яшамай, огъар алты йыл болагъанда анасы да бу дюньяны къоя. Яп-янгыз къалгъан яшны уллатасы Абдул-Муталлиб оьзюню янына алып сакълай. Ол яшыны яшын бек сюе ва аявлап сакълай, тек арадан заман гетип ол да герти дюньягъа гёче. Шондан сонг сегиз йыллыкъ чагъындагъы Мугьамматны ﷺ агъайы Абу Талиб оьз уьюне ала.
Мугьаммат ﷺ – Аллагь ﷻ учун Ер юзюнде лап аявлу ва адамланы арасында инг де яхшысы. Огъар сыйлы Къуръан тюшюрюлген. Ону яшавунда бек тамаша ва гьайран ишлер болгъан. Мугьаммат Пайхаммар ﷺ – бары да адамлар учун рагьмулукъ. Ол бизге Къуръан етишдирген, онда адамлар учун Аллагь ﷻ токъташдыргъан буйрукълар язылгъан. Къуръан – Аллагь ﷻ Пайхаммаргъа ﷻ берген лап уллу муъжизат. Пайхаммар ﷺ бизге Ислам динни етишдирген. Ол лап ахырынчы пайхаммар, ондан сонг дагъы болмажакъ. Мугьаммат Пайхаммар ﷺ – бизин учун лап аявлу, инг яхшы, къоччакъ, чомарт, арив адам. Ону хасиятлары лап да яхшылары. Пайхаммарны ﷺ етти яшы болгъан – дёрт къызы ва уьч уланы: Къасим, Зайнаб, Рукъия, Фатима, Умму Кульсум, Абдулла, Ибрагьим. Сонггъа таба Пайхаммар ﷺ Мадина шагьаргъа гёче. Онда ол бу дюньядан гетгенче яшай ва ону къабуру – равза – шонда. Гьар бусурман адам Ислам динни бары да рукнуларын кютмеге борчлу. Шону булан бирче биз Пайхаммардан ﷺ уьлгю алмагъа ва огъар ошамагъа къаст къылмагъа тарыкъбыз. Гиччи Асият эшитген хабарын бек ушата.
– Мен Аллагьны ﷻ ва Ону Пайхаммары Мугьамматны ﷺ бек сюемен. Аллагьны ﷻ разилигин къазанмакъ учун мен гьар заман яхшылыкъ этмеге къаражакъман, – дей Асият.
– Мен де гьар заман яхшы иш этмеге къаражакъман ва, анам, сагъа тынглап, сен айтгъанны этежекмен, – деп Муслим де къошула.
