Насип кёкден тюшмей, къол булан этиле
Насип кёкден тюшмей, къол булан этиле
Гюн яхшы болсун, аявлу къурдашлар! Насип не зат экенни гьакъында бирт де ойлашгъанмысыз?
Янгы оюнчакъ, бирдагъы гёлек, арив аякъгийим – шому насип? Мени эсиме гелеген кюйде, насип башгъа, уллу затлар булан байлавлу. Масала, узакъ сапардан уьйге къайтгъан ата яда ана булан ёлукъмакъ – насипдир. Юртгъа уллананы янына бармакъ, ону исси йымышакъларын ашамакъ да – насип. Къурдашлар булан топ ойнамакъ да – шодур. Бу бары да ишлер юрекни сююндюре. Гьатта шу сатырланы охуйгъанда да оьзюнг де билмейген кюйде иржайып йибересен.
Насип бизин ичибизде яшай. Аслусу – шогъар тийишли ачгъыч тапмагъа болмакъ. «Не ачгъыч?» – деп сорав берме боласыз. Лап тынч ачгъыч – айлана якъдагъылагъа абур-сый этмек, къардашлагъа кёмек гёрсетмек, гиччилеге рагьмулу янашмакъ. Бизге биз сюеген кюйде янашмаса да, биз шолай яхшы болма къарайыкълар. Ювукъ яшлагъа оюнчакъларынгны бермек, бир-биревге шат хабарлар айтмакъ, олтуруп бирче китап охумакъ, башгъаланы уьстюнлюклерине сююнмеге болмакъ – уллу иш! Яшавдан къуванмакъ учун кёп зат тарыкъ тюгюл чю! Къолубузгъа янгы оюнчакъ тюшмесе де, кепибиз бузулма герекмей. Айлана якъны насипден биз оьзюбюз толтурмагъа болабыз ва шо да уллу яхшылыкъ тюгюлмю дагъы?! Насип яймакъ – айлана якъны сююндюрмек, оьзюнгню де, башгъа адамланы да гёнгюн алмакъ.
Яшавда ёлугъагъан не къыйынлыкъны да башдан гечирме бола. Ушутмайгъан ишге ёлукъсакъ яда авур гьалгъа тарысакъ, ругьдан тюшме себеп ёкъ, некъадар, терсине жагь кюйде чалышма, гьаракат этмеге тарыкъ. Болгъан ишден дарс алып, гележекде янгылыш этмекден сакъланып, яшав узатма герекбиз.
