Къуванаман анамдан
Къуванаман анамдан
Йыгъылсам да, тынаман
Гёзьяшым ютуп.
Тюз юрюймен анамны
Къолундан тутуп:
Гьар гезик аварамны
Огъар тийдирмей,
Авуртгъанын къояман
Бир де билдирмей.
Уьйренемен этмеге
Оьзюмню гьайын.
Къуванаман анамдан
Гьар гёрген сайын.
Анамны сёзю
Аягъымны, аркъамны
Авуртдурдум йыгъылып.
Гёзьяшларым да къалды
Тамагъыма тыгъылып.
Къыйын болгъанда анам
Яныма гелди етип.
Башымны да сыйпады
Магъа алгъышын этип.
Дармандан артыкъ болду
Анамны татли сёзю.
Кимден де бек бир мени
Аявлайгъангъа оьзю.
Китап охуйман
Гюп-гюндюз янтайгъанман
Къалмасам да мен талып.
Китапгъа къаплангъанман
Къолгъа аявлап алып.
Анварны ёммакъларын
Охуйман тазза къанып.
«Авузгъа акъ бабишни»
Тураман янгы танып.
Ахырына чыгъарман
Айырмай эки гёзюм.
Оюнлар артгъа къалсын,
Шолай сюемен оьзюм.
