Z:АССАЛАМ ВЕРСТКА (ничего не удалять!)На сайтПапка As_salam-kum-06-2024LinksНовая папка
Айып этме алгъасама!
Школада топ оюндан ярышлар юрюле. «А» ва «Б» класны охувчулары жагь кюйде бир-бирине топ гийирте. Гьар команданы янын тутагъанлар акъыра-къычыра. Амма алгъа чыгъагъанлар ёкъ, эки де команда тенг геле. Буса да ахырынчы мюгьлетде топ гийиртип, «Б» клас алгъа чыгъып ута.
Оюндан сонг чечинеген ерде халкъ толгъан, къавгъадан бир зат да эшитилмей. Зенг къагъылгъан сонг, яшлар класларына алгъасай.
Дарслар битип, уьйге чыкъма турагъанда Артём ачгъычлары тас болгъанны эс эте. Киселерде де, портфельде де ёкъ. Уьйге гирип болмажагъына ол талчыкъмай, – анасы ишден тез къайтагъанын биле. Уллатасы савгъат этген тагъымчакъ ёкъ болгъангъа ичи буша. Агъач уста баласыны баласына арив этген безенчик яшгъа бек къыйматлы эди.
Безенчик планетагъа ошашлы этилген, онда шишадан денгизлер ва къуру ерлер ажайып кюйде ясалгъан. Яхшы кюйде къараса, дагъы да кёп затны гёрмеге бола. Улан шону бек къыйматлап юрюте болгъан.
Ачгъычларын излей туруп, Артём чечинеген уьйге чаба. Амма онда да ёкъ. Бир яш ачгъычланы «А» класда охуйгъан улан тапгъан деп билдире.
– Гишини затын неге алгъан? – деп, Артём ачувлана ва ол яшны излемеге бара.
Шо охувчуну тапгъандокъ, Артём ювукъ гелип:
– Сен урладынгмы мени ачгъычларымны? – деп айып эте.
– Аста къой! Бирев де шоланы урламагъан. Муна, ал, – деп, улан кисесинден ачгъычланы чыгъартып, Артёмгъа узата.
– Сен портфелимни хотгъагъанмысан? Бу чу уручулукъ!
– Бир затны да хотгъамагъанман. Жабарда эди олар. Ерден гётергенде бош юзюкню гёрдюм. Сонг шанжалны тюбюнде планетагъа ошашлы этилген дёгерек затны да тапдым ва ерине салдым шону. Ачгъычлар кимники деп сорадым, тек бирев де билмей эди. Сен о заман гетген эдинг. Сонг дарс башланды. Есини танапусда излермен деп тура эдим. Къой, битди, ачгъычланы мен сагъа къайтардым.
– Токъта! Мен айыплыман сени алдынгда. Сен ачгъычланы урлагъан деп эсиме гелди. Уллатам этген тагъымчакъ мени учун бек къыйматлы.
– Тюз, шо бек къужурлу этилген. Амма дагъы гезик алгъасама адамны айыплама.
– Дурус айтасан, сени гьакъынгда яман ойлашгъаным саялы гечип къой.
– Къайырмас, битди-гетди.
Уланлар бир-бирини къолларын алып, савболлаша.
Ахшам Артём болгъан ишни гьакъында ата-анасына хабарлай.
– Балам, гёзлеринг булан гёрмей туруп, бирт де биревню де айыплама. Дагъы ёгъесе адамны бек хатирин къалдырмагъа бола, – деп ата уланына насигьат эте.
