Ренкли гиччи борлар
Ренкли гиччи борлар
Бара-бара исси гюнлер аз болуп бара, яз битди десе ярай. Амма уллата булан паркда геземек учун сувукъ болуп битмеген.
Марат тез онгарылып чыгъа – ол уллата булан паркда геземеге бек сюе. Оьзю булан сув шиша ва ренкли гиччи борлар (мелки) алмагъа унутмай.
Уллата яшыны яшын къолундан тутуп, булар экиси де паркны сокъмагъы булан алгъасамай юрюй. Янгы явгъан янгурдан сонг терекдеги япыракълар ва от яп-яшыл гёрюне.
Кёлню къырыйындагъы скамейкагъа етишгенде, уллата онда олтурмагъа ушатагъан саялы, булар мунда токътай.
– Мен сурат этейим, сен буса, ял ал, – дей Марат.
– Яхшы, балам. Сен нени суратын этмеге сюесен?
– Гьали де билмеймен, – деп улан кисесинден борланы чыгъартып, ойлаша къала.
Амма кёп къалмай ярыкъ ва ренкли бир гиччи сурат гёрюнмеге башлай.
– Бигь, яшыл ренк етишмей къалды! Магъа шо нече де тарыкъ эди, – деп Марат пашман бола.
– Балам, сари ва гёк тюсню къошуп булгъаса, яшыл тюс болагъанны билемисен? Наринжи (оранжевый) тюс алмакъ учун буса, къызыл ва сари тюслени булгъама тарыкъ. Фиолетовый тюс учун, къызылгъа гёк къошула.
– Вагь, мен чи эшитмеген эдим, билмей эдим! Кёп савбол, ата! Мен шоланы эсде сакъларман ва айтгъан кюйде этмеге къарарман, – деп Марат разилигин билдире.
– Нечик эсинге геле, сари, къызыл ва гёк тюслени къошуп булгъаса, не тюс болажакъ? – деп уллата сорай.
– Боз яда боямыш?
– Боямыш тюс, – деп уллата жавап бере.
Чакъ ачыла туруп, гёлентки тая ва гюнню шавлалары ярыкъ берип, Марат сурат этеген ерге ва уллата олтургъан скамейкагъа етише. Сурат битмеге аз къалгъан.
– Балам, не арив сурат этдинг, – деп уллата Маратны макътай.
Борлары булан Марат булутлардан гёрюнеген гюнешни ва гиччирек энемжаяны суратын этген. Суратында Марат оьзюн ва уллатасын паркда гезеп барагъанын да гёрсетген.
Ишин битдиргенде Марат борларын жыйып, сув иче. Бош шишаны ол ювукъ арадагъы чёп контейнерге ташлай. Сонг къолун узатып, Марат уллатасына эретурмагъа кёмек эте. Олар сонг дагъы да бираз заман паркда бирче гезей.
Эсде сакъламакъ:
Борлар булан асфальтда сурат эте буса, машинлер юрюйген ерден таймагъа тарыкъ. Башы къызмас учун, сурат этегенде гюн тиймейген ерни сайлама яхшы. Уьйлени тамларында, машин токътайгъан, адам олтурагъан ва оьзге жамият ерлерде сурат этмеге яхшы тюгюл, шондан сакъланмагъа тарыкъ. Оьзюгюзню артындан тайдырыгъыз, насны-чёпню тийишли ерге ташлагъыз. Сурат этегенде, адамланы кепин гётерердей, арив гёрюнюшлю суратлар этигиз.
