Барлыгъыбыз саялы шюкюрлюк этейик
Барлыгъыбыз саялы шюкюрлюк этейик
Аявлу яшлар, бек агьамиятлы ва маъналы ишни гьакъында хабарламагъа сюебиз бугюн.
Ата-анагъа, улланагъа ва уллатагъа, олай да агъа-инибизге, къызардашыбызгъа къарайгъанда не гьислер къуршай бизин? Озокъда, арив гьислени сезебиз. Шоссагьат иржаймагъа да сюебиз. Бу лап ювукъ къардашларыбызны янында болмагъа, олар булан къатнамагъа, болагъан кёмегибизни этмеге сюебиз. Гечелер олар айтагъан къужурлу ёмакълагъа кёп сююп тынглайбыз. Эртенлер буса, янгы къызартылгъан локъумланы ийисинден уянабыз. Ашап тоюп, гечеден гьазирленген опуракъны тез-тез гийип, школагъа яда яшлар бавуна ёртабыз. Авруп къалсакъ, къалын ювургъангъа чырмалып ятабыз, ана да малина булан тёшекге исси чай гелтире. Ананы исси къолу мангалайыбызгъа аясын салса, иссилик барны-ёкъну къуралсыз да биле. Бизин кёп сюеген уллана ва уллата орамгъа геземеге элтер. Сюрюнсек, уллата шоссагьат гётерип алар, уллана авуртгъан ерибизни сыйпар. Гьайыбызны этеген оланы иссилигин даим гёребиз, билебиз.
Къызардашлар булан бирче «къуллукъ» этмеге, къурчакъланы гийиндирмеге, башын тарамагъа, уьюн безендирмеге огь не арив оюндур. Жыйылып ашбазлар болмагъа да ярай. Шо мюгьлетде гиччи уланкъардашыбыз орамда топ ойнай. Гюнню узагъында гьар ким оьз ишлерин этип битдирип, ахшам бир тепсини айланасында жыйылып, уьстюнлюклерибизни ва ойларыбызны айтабыз. Аш да, лакъыр да бек татли тие.
Къарагъыз, нечик къужурлу ва аривдюр биз яшап барагъан яшав! Булай гьалгъа уьйренгенбиз ва дагъы башгъа кюй болмайдыр деп эсибизге геле.
Шолай яшай туруп, биз бир-бирде шюкюрлюк этмеге унутуп къалабыз. Уллулар бизин гьайыбызны этеген саялы, татли ашыбыз бар саялы, этилген дарслар саялы… Бир башлап къардашларыбызгъа «баракалла» деп айтмагъа тарыкъбыз. Оьзлеге разилик сёзлер айтып эшитсе, олар ушатмай къоймас. Къыйын тюгюл чю оланы шолай сююндюрмеге.
Арив сёз айтмагъа къызгъанмагъыз. Исси сёз адамны кепин гётере. Яшлар, бугюн сизге тапшурув: анагъызны, атагъызны, улланагъызны ва уллатагъызны къучакълап, оланы сюегенин айтмакъ. Олар сизин гьайыгъзны эте, сюе, тарыкъ-герекни ала. Динибиз де уьйрете бизин гьар яхшылыкъ саялы Есибизге де, адамлагъа да шюкюрлюк этмеге.
