Герти къурдашлыкъ
Герти къурдашлыкъ
Гьар кимни де ювукъ къурдашы бола, биревлени бир тюгюл, кёп де бола. Бугюн эсгермеге сюеген хабардагъы яшлар булан оьзюгюзню тенглешдирмеге боласыз. Оланы еринде болгъан бусагъыз не этер эдигиз?
Умар ва Сайит – ювукъ къурдашлар. Олар бирт де эришмеген, неге десе бир-бирине ёл къоюп уьйренген ва яман тиеген сёзлени айтмай болгъан.
Амма бир гезик ювукъланы арасында эришивлю гьал тува. Эришивню себебин эки де къурдаш айтардай уллу гёрмей, тек сёзню уьстюне сёз къошула туруп, уланлар бирче ойнамайгъан ва гьатта бир-бирине сёйлемейген гьалгъа геле. Я Сайит, я Умар бу гезик ёл къоймагъа сюймей, оланы гьариси меники тюз деп, башгъасы биринчи абат алар деп къарай.
Арадан кёп заман гетмей, башгъа яшлар Умарны башын сёйлейгенин Сайит эшитип къоя. Ончакъы заман къурдашы болуп тургъан яшны гьакъында айтылагъан сёзлени, мысгъыллавну Сайит ушутмай. Чыдап болмай, ол лакъыргъа къошулуп, Умарны янын тута.
– Не этесен ону янын тутуп? Сиз энни къурдашлар тюгюлсюз чю, – деп шо яшланы бириси тамаша бола.
– Мен ону булан сёйлемей бусам да, ол мени къурдашым кюйде къала ва мен ону янын алда йимик тутажакъман, – деп Сайит жавап бере.
Шо мюгьлетде Умар оьзю де бу ерден оьте. Сайит о яшлагъа къаршы турагъанын эс этип, Умар арада не болуп турагъанын билмеге сююп, ювукъ геле.
– Умар, бары да зат яхшы, биз масъаланы чечдик. Юрю, барайыкъ, – деп Сайит къурдашын алып гете.
Шо гюн эришгенин къоюп, яшлар дагъыдан бек ювукъ бола. Олар бир-бирин тутагъан кюю оьзге яшлагъа герти къурдашлыкъны уьлгюсю бола. Къурдашыны янын тутмакъ бек агьамиятлы иш, ол шо ерде ёкъ ва гьатта эришген гьалда буса да. Уланлар булайлыкъны англай болгъан. Шо саялыдыр оланы къурдашлыгъы къатты болгъаны.
Муна шулай иш болду къурдашланы арасында. Яшлар, сиз нечик этер эдигиз оланы еринде болгъан бусагъыз? Къурдашлыкъны къатты юрютеген болмакъ гьар кимге де ёрайбыз!
