Дагъыстанны нартлары

Дагъыстанны нартлары

Толкъун геле, Дагъыстангъа сеп болуп,
Толкъунлары тав башдагъы тавушлар.
Альберт, Завур, Абдурашит айтмагъа,
Сав дюньягъа, Россиягъа, «чавушлар».

Къумукъ тюзню, Хазарланы Нартларын,
Анадолдай, Атоллудай атларын.
Олимпия – Токиода ярышда,
Алтын медаль булан язгъан хатларын.

Толкъун геле, татувлукъну тамурлап,
Савлай дюнья, «Уьч Батырны» абурлап.
Игитлени гьеч миллетин сорамай,
Оьч адамда яманлыкълар ёрамай.

Олимпия – Токиону сыртына,
Сынмасланы санда гёрмей ятдыргъан.
Сав дюньяны янгыртагъан тавушлар,
Дагъыстанны атын эпсиз артдыргъан.

Къаракъушлар къанат къагъа кепленип,
Инсан чыгъа, байрам гюнге белсенип.
Аврувланы тургъуздулар аякъгъа,
Неге тюгюл, ошап къалгъан маякъгъа.

Атлары да Асхар тавгъа тенг геле,
Альберт, Завур, Абдурашит юлдузлар.
Дюньябызны гьайранлыкъгъа къалдыргъан,
Гележекге, уьмметимдей умутлар.

Уьлкер юлдуз, Зайналабит – Танг-Чолпан,
Альберт, Завур, Абдурашит къоччакълар.
Аллагь берген къуватына таянгъан,
«Уьч батырны» – яратгъанда «къучакълар».

Кёкге, Ерге, гече-гюнге къарамай,
Ай, Гюн, булан ярыкъ бере юлдузлар.
«Уьч Батырны» – гележеги генг болуп,
Бугюн йимик, балкъып турсун умутлар. 

АДИЛ БИЙТЕМИРОВ,

ЯХСАЙ ЮРТ