Аврумакъ яхшы тюгюл
Бир гезик Аминканы гиччи къызардашы авруп къала. Ана авруйгъан къызыны къырыйындан таймай, нечик буса да баласын сююндюрмеге къарай. Авруйгъан къызардашына четим этмесин учун Аминагъа къавгъалап ойнамагъа къоймай. Столдагъы тюрлю-тюрлю татлиликлер де янгыз авруйгъан Фатима учун.
Шолай гьалда Аминагъа къарамагъа ананы заманы да къалмай. Ялкъып бирбирде ол мамасын оьзю булан ойнамагъа тилей. Амма ана авруйгъан башгъа баласына къарайгъан саялы огъар етишип болмай. Булайлыкъ Аминаны кепин буза. Неге десе ол мамасы ва къызардашы булан ойнап уьйренген болгъан. Гьали буса гиччи къызашыны къырыйына гирмеге де ярамай, мамасыны да огъар заманы етишмей.
Шолайлыкъ булан пашманлыгъын басылтмакъ учун, Амина абзаргъа чыгъып геземеге ойлаша. Анасындан ихтияр да алып эшикден чыгъа турагъанда, аврумас учун ол башына бёрк гиймеге герек деген сёзлени эшите. Шо мюгьлетде къыз бир тамаша ой ойлаша. Ону эсине гелеген кюйде, аврумакъ бек яхшы иш, неге десе яшлар бавуна бармагъа тарыкъ тюгюл, не сюйсе этмеге ва гюнню узагъында мальтиклеге къарамагъа ярай, бары да татли затлар да гьар заман къырыйынгда ва, аслусу, маманг таймай янынгда бола.
Бу «гьакъыллы» ойлар булан Амина башындагъы папахын чечип, тюкенге багъып бара. Ол морожный де алып, аврумагъа кёмек этер деп ону тез-тез ашай. Узакъ турмай ол уьюне къайта ва къачан аврурман экен деп къарай. Балики, ол оьзю де билмей, муна буссагьат аврума да авруйдур. Нечик билмеге герек экен шону? Аминаны соравлары кёп болмагъа башлай. Амма ол мекенли кюйде билегени йимик, авруп къалса мамасы шону тез эс этежек, тек ана бир зат да гёрмей тура. Ойлашгъаны бажарылмагъанны билгенде Аминаны кепи бузула ва шо гьалда ол юхламагъа ята. Бираздан Фатима сав бола ва къызардашлар алда йимик ойнай туруп бирче заманын йибере. Амина аврумагъанына сююне. Авругъан эди буса, гьали олар бирче ойнамагъа болмас эди.
Амма узакъ къалмай Амина тамагъы тыгъылгъанны ва ютгъунмагъа къыйын экенин гьис эте. Арты булан иссилик гётериле, башы да авруй, къаркъарасы буса бийик ерден ерге тюшген йимик авуртмагъа башлай. Амина авруп къалгъанын шоссагьат билди. Оьзюне яман болгъанлыкъдан ол авругъанына сююнмеди. Ону краватгъа да ятдырып сав этмеге башлады. Доктор гелип къарагъан сонг, огъар он гюн уколлар этмеге тарыкъ болду. Шону эшитгенде Амина бирден-бир «бузулуп» къалды. Ол чу бары да затдан бек уколлардан къоркъа. Аврувгъа тюрлю-тюрлю татлиликлер гелтире, тек ол алда йимик сююнмей олагъа. Башы ва тамагъы бек авруйгъан саялы Амина бир зат да ашамагъа сюймей.
Бу гьалгъа тюшгенде Амина, этгенине гьёкюне, озокъда. Амма гьёкюнген булан пайда ёкъ ва гиччи къыз дурус этмей, оьзю оьзюне къыйынлыкъ гелтиргенин биле. Шолайлыкъда, Амина аврумакъ яхшы тюгюлюн билмеге башлай. Авруп ятгъанча, татлиликлер, мультиклер болмаса да къолай. Шондан сонг Амина гьакъыллы бола ва оьзюню савлугъун аяп сакълай ва аврувлагъа языгъы чыгъа.
