Эсги кагъызлар
Къырда сувукъ эди, шо саялы Марат шарфын тап гёзлерине ерли тартып байлагъан. Яшлар бавундан уьюне ерли ол бир сёз де айтмай иннемей юрюй.
– Не арыдым яяв юрюме! Уьстюмде кёп опурагъым да бар! – деп ол уьюне гирип аякъгийимлерин чечегенде кант эте.
– Къыш гелген чи, шо саялы исси опуракъ гиймесе ярамай, – деп огъар анасы англата.
– Ана, бизин яшлар бавубузда воспитатель къатын коридорда (догъа, гьарве) билдирив илген. Шо не экенни мен огъар сорама болмай къалдым.
– Билдиривде не язылгъан эди дагъы?
– Ма-ку-ла-ту-ра жыйыв. Бу не къыйын сёздюр!
Ана иржая.
– Балам, бу дюр къолланып битген эсги кагъыз ва картон жыйыв демек. Кагъызны неден этегенни сен билемисен? Агъачдан эте. Тереклени гесмей, шоланы аямакъ учун, бир къоллангъан кагъызны янгыдан ишлетеген кюй бар.
– Къоллангъан сонг кагъызны янгыдан нечик ишлетмеге бола? – деп Марат билмеге сюе.
– Эсги кагъызны жыйып, ишлетген сонг шондан йымырткъа къутукълар, картон, оьзге затлар эте, – деп ана англата. – Гьатта кагъыз пакетлер этмеге де бола. Шолай пакетлени тюкенлерде гьали кёп къоллайгъан болгъан.
– Не ажайыпдыр! Бу иш айлана якъгъа зарал да этмей.
– Тюз айтасан, – деп ана рази бола, – сонг да, булайлыкъ булан биз тереклени аяп сакълайбыз. Бир тон эсги кагъыз он терекни гесмей сакълама имканлыкъ берегенни гёз алдынга гелтир.
– Мен бир иш ойлашдым! – деп Марат сююнюп йибере. – Мени шкафымда эсги суратлар ва кагъыздан этилген о-бу кёп бар. Шоланы айырып, тарыкъ тюгюллерин яшлар бавуна элтейим чи. Уьстевюне шкафымда ер де эркин болажакъ! – улан анасына иржая.
– Не арив ойлашдынг! – деп ана яшыны янын тута, огъар рази бола. – Амма башлап уьстюнгню чеч, жувун ва ашама олтур. Мен исси чай ичип исинме сюемен.
Ашагъан сонг ана да, Марат да хыйлы заман шкафны ичин яхшы кюйде хоталап, эсги суратланы ва тарыкъ тюгюл кагъызланы айырып бир тёбе эте. Айлана якъны, табиатны къоруп сакъламакъ учун, пайдалы иш этгенине Марат бек шат.
