Хораз кампет
Хораз кампет
Тимур школадан гёнгю гётерилген кюйде геле. Уьйге багъып элтеген сокъмакъда яшыл от ва гюллер оьсе. Гьава да бек арив, тангала буса, ял алагъан гюнлер башлана ва хыйлы къужурлу ишлер болажакъгъа умут бар. Къыргъа чыгъып ойнажакъ, сонг да атасы, къызардашын да алып, буланы экисин де, зоопаркгъа элтежекге сёз берген.
Шо мюгьлетде Тимур кисесинде хораз кампет барын эсге ала – къурдашы Руслан берген. Улан татлини киседен чыгъартып ача, тек шо заман…
– Тимур! – деп, анасы чакъырагъан аваз эшитиле. Ана уьйден сют алма чыкъгъан болгъан.
Тимур сесгенип йибере ва кампетин ерге тюшюре. Къолунда янгыз кампетни кагъызы къала.
– Бигь, – деп, улан кюстюне. – Сююнмеге де болмадым.
– Не болду? – ана ювукъ гелип, кампет кагъызны гёрюп, болгъан ишни англай. – Гётермегейсен кампетни, о нас болду. Юрю, уьйде мен сагъа башгъасын берермен. Бу кампет кимге буса да тарыкъ болар.
Ана кампетни ёлну ортасындан чубукъ булан теберип, ягъадагъы отгъа багъып йылышдырды.
«Ерге тюшген кампет кимге тарыкъ болар?» – деп, Тимур ойлаша къалды. Амма бираздан ойлары башгъа якъгъа чыкъды. Уьйде къаймакъ ва локъумлар булан татувлу борш бар эди. Ашап битип къызардашы булан сонг лото ойнады.
Артындагъы гюн орамгъа ойнамагъа чыкъгъанда, Тимур тюнегюн болгъан ишни эсге ала ва кампет еринде къалгъанмы экен, деп къарамагъа сюйдю.
Хораз кампетни орнунда ерде къара япыракъ гёрюндю.
«Къара япыракълар боламы дагъы? – деп, Тимур тамаша болду. – О чу тербенме де тербене…»
Япыракъ жаны бардай гертиден де тербене. Иелип къарагъанда, улан шо япыракъ тюгюл экенин гёре.
«Бу чу къомурсгъалар! Ажайып иш! Аллелей нече де кёп бар!»
Гертиден де, кампетни уьстю булан къара тюслю къомурсгъалар юрюй, оланы санаву юзден артыкъ болгъандыр. Бу «асгер» бир-бири булан ёлугъа, «сёйлей», кёкден тюшген бу татлиликни уьюне нечик етишдирсе къолай болар, деп «ойлаша».
Загьматгъа берилген бу жан-жанываргъа Тимур узакъ къарай.
«Гьали англашылды мени хораз кампетим кимге тарыкъ болгъаны», – деп ойлашып, ол болгъан ишни хабарламакъ учун, къурдашы Русланны янына чабып гете.
