Аналаны байрамы

Аналаны байрамы
Ювукъ бола гюн сайын,
Анам учун лап яхшы
Савгъат тапма не къыйын!

Гечелер гелмей юхум,
Уллу ой тюшген магъа.
Арив-арив савгъатлар
Акъчам да ёкъ алмагъа.

Бола бусам анама
Кёп гюллер жыяр эдим.
Анам юрюйген ёлгъа
Барын да яяр эдим.

Болмасам да гюл жыйып,
Къой, этейим адатын,
Уллу-уллу кагъызгъа
Шо гюллени суратын.

Бираз уллу болайым –
Бары гюлню жыярман!
Анам юрюйген ёлгъа
Барысын да яярман!

Сююндюрме сюемен

Мен гьали уллу къызман,
Боламан жувуп поллар.
Анам ишден къайтгъанча,
Тап-таза болар олар.

Бираз къыйын тийсе де,
Бары ишни этейим.
Анамны сююндюрме
Сюемен чи, нетейим?

Сююнюп менден Анам,
Къучакълап, оьбюп къояр.
Анамны исивюнден
Бары талгъаным таяр.

НЮРЬЯНА АРСЛАНОВА