Билмегенге айып тюгюл ‒ билме сюймейгенге айып

Билмегенге айып тюгюл ‒ билме сюймейгенге айып

Даим алышынагъан бизин тамаша дюньябыз ажайып гёзел. Ону уллулугъу гьайран къалдыра. Инсан бары да затны, озокъда, билмеге болмас, тек айлана якъны ахтармакъ, билмеге къарамакъ – бек агьамиятлы.

Школада охувчу яшлар ушатмайгъан дарсына: «Не учун тарыкъдыр бу магъа? – деп айта бола. Амма ойлашып къараса, шо гертими дагъы? Дюньяны гьакъында биз школада охумакъдан билебиз: табиат ишлер ва олар неден болагъанны – айлана якъны гьакъындагъы дарсдан, къаркъара нечик ясалгъанны – биологиядан, дурус сёйлемекни ва китап охумакъны – адабиятдан, савлукъну гьайын этмекни физкультурадан билебиз. Демек, гьар дарс агьамиятлы ва тарыкълы билим бере. Шолар барысы да инсанны билимин артдыра.

Табиат булан айлана якъны тазалыкъда сакъламакъ учун экологияны билмеге тарыкъ. Къатты уьй тизмек учун, къурулуш илмугъа охума тарыкъ, адамланы савлугъун къолай этмек учун медицинагъа уьйрене ва шо кепде гьар тармакъдан билим алмагъа герек.

Дюньядагъы гьар касбуну оьз къыйматлыгъы бар ва шону аслу мурады – айлана якъгъа пайда гелтирмек.

Билим ахтармакъ – яхшы ишлерден. Китап охуйгъан, билимин артдырагъан гиши айлана якъдагъылар учун къужурлу адам болур, ону булан гьар тюрлю темалагъа гёре къатнамагъа рагьатдыр, къурдашлары да кёпдюр.

Яшлар, охугъуз, билим алыгъыз ва билгенигизни яхшы ишлеге бакъдырыгъыз!

Айшат Расулова